(វ៉ាស៉ីនតោន)៖ ប្រធានាធិបតីសហរដ្ឋអាមេរិក លោក ដូណាល់ ត្រាំ បានថ្លែងកាលពីថ្ងៃសុក្រ ទី៣១ ខែកក្កដា ឆ្នាំ២០២៦ថា យុទ្ធនាការរបស់សហរដ្ឋអាមេរិកប្រឆាំងតុលាការព្រហ្មទណ្ឌអន្តរជាតិ (ICC) គឺមានបំណងការពារនាយករដ្ឋមន្ត្រីអ៉ីស្រាអែល លោក បេនចាមីន ណេតាន់យ៉ាហ៊ូ និងអ្នកដទៃទៀតពីការកាត់ទោស មិនមែនដើម្បីតែការពាររូបលោកផ្ទាល់នោះទេ។ នេះបើតាមការចេញផ្សាយដោយ ទីភ្នាក់ងារព័ត៌មាន Reuters។
លោក ត្រាំ បានធ្វើអត្ថាធិប្បាយបែបនេះ បន្ទាប់ពីរដ្ឋមន្ត្រីការបរទេស លោក Marco Rubio បានប្រាប់កិច្ចប្រជុំគណៈរដ្ឋមន្ត្រីនៅ Camp David ដែលជាកន្លែងសម្រាកវិស្សមកាលរបស់ប្រធានាធិបតីអាមេរិក ថាប្រទេសចំនួន៥ហើយ បានប្រកាសផែនការចាកចេញពីតុលាការ ICC ចាប់តាំងពីសហរដ្ឋអាមេរិកបានចាប់ផ្តើមយុទ្ធនាការ កាលពីប៉ុន្មានសប្តាហ៍មុន ប្រឆាំងនឹងអ្វីដែលខ្លួនថា ជាការគំរាមកំហែងចំពោះអធិបតេយ្យរបស់សហរដ្ឋអាមេរិក។ លោក Rubio បានឆ្លើយតបថា អ្នកដែលស្ថិតក្នុងគ្រោះថ្នាក់បំផុតគឺសមាជិកកងទ័ពអាមេរិក ដែលលោកថា អាចប្រឈមនឹងការកាត់ទោស បើទោះបីច្រើនឆ្នាំកន្លងផុតទៅក៏ដោយ ជុំវិញសកម្មភាពរបស់ពួកគេនៅក្នុងសង្គ្រាម។
ICC ត្រូវបានបង្កើតឡើងក្នុងឆ្នាំ២០០២ ដោយសហគមន៍អន្តរជាតិ ដើម្បីកាត់ទោសឧក្រិដ្ឋកម្មសង្គ្រាម អំពើប្រល័យពូជសាសន៍ និងឧក្រិដ្ឋកម្មប្រឆាំងមនុស្សជាតិ។ តុលាការនេះ ប្រើប្រាស់យុត្តាធិការលូកដៃ លុះត្រាតែរដ្ឋជាសមាជិកមិនអាច ឬមិនចង់កាត់ទោសអំពើឃោរឃៅទាំងនោះ ដោយខ្លួនឯង។ សហរដ្ឋអាមេរិកមិនធ្លាប់ជាសមាជិកនៃតុលាការនេះទេ។ ទោះជាយ៉ាងណា ធម្មនុញ្ញ ICC ក៏ផ្តល់អំណាចដល់តុលាការ ក្នុងការកាត់ទោសឧក្រិដ្ឋកម្មឃោរឃៅ ដែលបានប្រព្រឹត្តលើទឹកដីនៃរដ្ឋជាសមាជិក ដោយពលរដ្ឋនៃប្រទេសមិនមែនជាសមាជិកផងដែរ។
ការប្រឆាំងរបស់លោក ត្រាំ ចំពោះតុលាការ ICC គឺមានតាំងពីអាណត្តិដំបូងរបស់លោកមកម្ល៉េះ។ វាបានលេចឡើងម្តងទៀត ជាមួយនឹងផែនការដាក់ទណ្ឌកម្មមន្ត្រី ICC ដែលជាគំនិតត្រូវបានបង្កើតឡើង កាលពីខែវិច្ឆិកា ឆ្នាំ២០២៤ នៅពេលដែលលោក ត្រាំ ជាប់ឆ្នោតសាជាថ្មី ហើយ ICC បានចេញដីកាចាប់ខ្លួនលោក ណេតាន់យ៉ាហ៊ូ ជុំវិញការចោទប្រកាន់ឧក្រិដ្ឋកម្មសង្គ្រាម និងឧក្រិដ្ឋកម្មប្រឆាំងមនុស្សជាតិ ក្នុងសង្រ្គាមនៅតំបន់ហ្កាហ្សា។
គួរបញ្ជាក់ថា កាលពីខែកក្កដា លោក Rubio បានថ្កោលទោសតុលាការ ដែលមានមូលដ្ឋាននៅទីក្រុងឡាអេប្រទេសហូឡង់ ដោយលើកឡើងពីការអំពាវនាវរបស់ក្រុមសកម្មជនឱ្យ ICC ស៊ើបអង្កេតសមាជិកយោធាអាមេរិក ជុំវិញសកម្មភាពដូចជាការបណ្តេញជនអន្តោប្រវេសន៍ ឬការវាយប្រហាររបស់អាមេរិកលើទូកដែលមន្ត្រីទីក្រុងវ៉ាស៉ីនតោន អះអាងថា ធ្វើសកម្មភាពរត់ពន្ធគ្រឿងញៀន។
រដ្ឋបាលលោក ត្រាំ បាននិយាយថា ខ្លួននឹងបញ្ចុះបញ្ចូលប្រទេសដទៃទៀតឱ្យចាកចេញពីតុលាការ ICC និងប្រើប្រាស់បម្រាមធ្វើដំណើរ និងទណ្ឌកម្មបន្ថែមទៀតប្រឆាំងនឹង ICC ក៏ដូចជាអង្គការពាក់ព័ន្ធនានា ដើម្បីព្យាយាមបំបាក់សមត្ថភាពតុលាការនេះ ខណៈក្រុមចៅក្រម ICC ផ្ទាល់ និងក្រុមអ្នកតស៊ូមតិអាមេរិក ចោទប្រកាន់រដ្ឋាភិបាលអាមេរិកថា កំពុងរំលោភបំពានសិទ្ធិសេរីភាពក្នុងការបញ្ចេញមតិ៕
