(កំពង់ចាម)៖ ឯកឧត្តម យឹម ឆៃលី ប្រធានក្រុមការងារថ្នាក់កណ្តាលចុះជួយខេត្តកំពង់ចាម និង ឯកឧត្តម អ៊ុន ចាន់ដា ប្រធានគណបក្សប្រជាជនខេត្តកំពង់ចាម នៅព្រឹកថ្ងៃទី០១ ខែសីហា ឆ្នាំ ២០២២នេះ បានជួបសំណេះសំណាលជាមួយ ក្រុមប្រឹក្សាឃុំ ក្នុងស្រុកកងមាស ដែលទើបជាប់ ឆ្នោតអាណត្តិទី៥ ឆ្នាំ២០២២ និងបានជំរុញឲ្យអនុវត្តភូមិឃុំមានសុវត្ថិភាព ការពារសន្តិសុខ និង បម្រើសេវាជូនប្រជាពលរដ្ឋឲ្យបានល្អ។
ស្ថិតក្នុងឱកាសនោះ ឯកឧត្តម យឹម ឆៃលី បានថ្លែងថា សមាជិកក្រុមប្រឹក្សាឃុំ ទើបជាប់ឆ្នោត ត្រូវបន្តជំរុញ និងពង្រឹងការអនុវត្តគោលនយោបាយភូមិ ឃុំមានសុវត្ថិភាពទាំង ៧ចំណុចគឺ ផ្តល់ សេវាសាធារណៈ ជាពិសេសសេវារដ្ឋបាល ប្រកបដោយគុណភាព តម្លាភាព និងទទួលបានជំនឿ ទុកចិត្ត និងគ្មានបទល្មើស លួច ឆក់ ប្លន់ គ្រឿងញៀន ល្បែងស៊ីសងខុសច្បាប់ និងបទល្មើសគ្រប់ ប្រភេទ, មានសណ្តាប់ធ្នាប់សាធារណៈល្អ ជាពិសេសគ្មានគ្រោះថ្នាក់ចរាចរណ៍ គ្មានអំពើអនាចារ គ្មានការជួញដូរមនុស្ស ពិសេស ស្ត្រីនិងកុមា គ្មានអំពើហិង្សាក្នុងគ្រួសារ និងគ្មានក្មេងទំនើងដោះ ស្រាយវិវាទនៅមូលដ្ឋាន ក្រៅប្រព័ន្ធតុលាការប្រកបដោយគុណភាព និងប្រសិទ្ធភាព ភូមិ ឃុំ ត្រូវមានអនាម័យល្អ មានសោភ័ណភាពល្អ និងមានបរិស្ថានល្អ ត្រូវឆ្លើយតបឱ្យបានទាន់ពេលវេលា ចំពោះគ្រោះមហន្តរាយ និងរាល់ជំងឺឆ្លងរាតត្បាតកាចសាហាវនានាប្រកបដោយប្រសិទ្ធភាព។
ឯកឧត្តម បន្តថា ទន្ទឹមនឹងនោះ ត្រូវខិតខំលើកកម្ពស់អភិបាលកិច្ច ធានាការផ្តល់សេវាសាធារណៈ ប្រកបដោយតម្លាភាព ការទទួលខុសត្រូវខ្ពស់ និងឆាប់រហ័សជូនប្រជាជន ពង្រឹងយុត្តិធម៌ និង សមធម៌សង្គម ដោយអនុវត្តឱ្យបានម៉ឺងម៉ាត់អភិក្រម «ឆ្លុះកញ្ចក់ ងូតទឹក ដុសក្អែល ព្យាបាល និងវះ កាត់» និងត្រូវខិតខំដោះស្រាយជម្លោះដីធ្លីក្រៅប្រព័ន្ធតុលាការឱ្យបានល្អ និងឆាប់រហ័ស ខិតខំជំរុញ ការអនុវត្តគោលនយោបាយអភិវឌ្ឍន៍ឃុំ ឆ្នាំ២០២២-២០២៧ របស់សង្កាត់នីមួយៗ ដែលបាន ប្រកាសជូនប្រជាជន ឱ្យទទួលបានសមិទ្ធផលថ្មីៗទៀត និងយកចិត្តទុកដាក់រៀនសូត្រ កសាង សមត្ថភាពការងារខ្លួនដែលជាប្រធានជំទប់ និងសមាជិកក្រុមប្រឹក្សាទទួលតំណែងថ្មី។
ឯកឧត្តម ក៏ជំរុញ ត្រូវពង្រឹងការអនុវត្តឱ្យបានល្អ នូវតួនាទី ភារកិច្ច និងរបៀបរបបធ្វើការជាពិសេស ការពង្រឹងមន្ត្រីបង្គោលរបស់ចៅសង្កាត់ មេប៉ុស្តិ៍ របស់ក្រុមប្រឹក្សា ស្មៀន និងមេភូមិឱ្យទទួលបានការ គោរពស្រឡាញ់រាប់អាន និងជឿទុកចិត្តពីប្រជាជន ត្រូវហ៊ាននិយាយរិះគន់កែលម្អ មន្ត្រីបង្គោល ណាដែលបម្រើប្រជាជន ក្នុងមូលដ្ឋានខ្លួនមិនបានល្អផងដែរ៕
