(ភ្នំពេញ)៖ ឯកឧត្តម បណ្ឌិត ហ៊ុន ម៉ាណែត បេក្ខភាពនាយករដ្ឋមន្ត្រីបន្តវេនដ៏មានប្រជាប្រិយភាព មកពីគណបក្សប្រជាជនកម្ពុជា បានគូសបញ្ជាក់ថា គោលការណ៍សកម្មភាពបក្សប្រជាជនកម្ពុជា គឺប្រកាន់នូវសច្ចធម៌ អហិង្សា សាមគ្គីភាព និងការបង្រួបបង្រួមរវាងខ្មែរ និងខ្មែរ។ គោលការណ៍សកម្មភាពនេះ គឺលោកបណ្ឌិត ផ្តោតជាសំខាន់ទៅលើសកម្មភាពការងាររបស់ក្រុមយុវជនគណបក្សប្រជាជន បានធ្វើនៅក្រៅប្រទេស។
ឯកឧត្តម បណ្ឌិត ហ៊ុន ម៉ាណែត ត្រូវបានគេដឹងថា ជាយុវជនបក្សប្រជាជនកម្ពុជា ដែល បានផ្តួច ផ្តើមរៀបចំចងក្រងយុវជនបក្សធ្វើសកម្មភាពផ្សារភ្ជាប់ទំនាក់ទំនងជាមួយប្រជាពលរដ្ឋខ្មែរនៅក្រៅ ប្រទេសមានដូចជានៅអឺរ៉ុប អាមេរិក អូស្ត្រាលី និងនៅកូរ៉េ ខាង ត្បូង ជាដើម។ តាមរយៈសកម្មភាពទាំងនេះ ធ្វើឱ្យប្រជាពលរដ្ឋខ្មែររស់នៅក្រៅ ប្រទេស ជាពិសេសនៅអឺរ៉ុប និង អាមេរិក មានទំនាក់ទំនងល្អជាមួយប្រទេសកំណើត ហើយក៏បានជ្រូតជ្រាបពីការវិវឌ្ឍន៍របស់ ប្រទេសកំណើតរបស់ខ្លួន ហើយក៏បានផ្តល់ការជឿជាក់លើការដឹកនាំរបស់បក្សប្រជាជនកម្ពុជា ផងដែរ។ ក្នុងពិធីសំណេះសំណាល និងជួបជុំប្រជាពលរដ្ឋខ្មែរ រស់នៅសហរដ្ឋអាមេរិក និង ប្រទេសកាណាដា ក្នុងឱកាសអបអរសារទរមហាសង្ក្រាន្តឆ្នាំថ្មី នាថ្ងៃទី០៨ ខែ មេសា ឆ្នាំ២០២៣ លោកបណ្ឌិត ហ៊ុន ម៉ាណែត បានរំលឹកឡើងវិញនូវសកម្មភាព ការងារមួយចំនួនដែលក្រុមយុវជន គណបក្សប្រជាជនកម្ពុជា បានធ្វើនៅក្រៅប្រទេសនាពេលកន្លងទៅ។
អនាគតមេដឹកនាំកម្ពុជាដ៏មានថាមពល និងបានបញ្ចប់ការសិក្សានៅអាមេរិក និងចក្រភពអង់គ្លេស រូបនេះ បានរំលឹកថា ក្នុងពេលធ្វើសកម្មភាពនៅក្រៅប្រទេស ក្រុមការងាររងការវាយប្រហារយ៉ាង ខ្លាំងក្លាពីអ្នកគាំទ្របក្សប្រឆាំង។ ប៉ុន្តែក្រុមការងារប្រកាន់ខ្ជាប់នូវគោលការណ៍សច្ចធម៌ អហិង្សា សាមគ្គីភាព និងការបង្រួបបង្រួមរវាងខ្មែរ និងខ្មែរ ដោយមិនតបតទៅនឹងក្រុមប្រឆាំងវិញនោះ ឡើយ។
«នៅក្រៅប្រទេសគេវាយប្រហារច្រើនណាស់។ គេថាក្រុមការងាររៀបចំអង្គការចាត់តាំងយុវជនរបស់ គណបក្សប្រជាជនកម្ពុជា ទៅដើម្បីបំបែកសហគមន៍ខ្មែរនៅក្រៅប្រទេស។ រឿងនេះមិនពិតទាល់តែសោះ ហើយប្រជាពលរដ្ឋយើងនៅទីនេះជាសាក្សី»។ នេះជាការបញ្ជាក់របស់ ឯកឧត្តម ហ៊ុន ម៉ាណែត។
តបការចោទប្រកាន់ខាងលើនេះ ឯកឧត្តម បណ្ឌិត ហ៊ុន ម៉ាណែត បានគូសបញ្ជាក់សកម្មភាពរបស់ ក្រុមការងារយុវជនបក្សប្រជាជនកម្ពុជា គឺបង្ហាញនូវការពិតពាក់ព័ន្ធការអភិវឌ្ឍន៍ប្រទេសជាតិ។ បន្ថែមពីលើនោះ ក្រុមការងារតែងប្រកាន់ខ្ជាប់នូវធម៌អហិង្សា ទោះបីមានការវាយប្រហារពីក្រុមបក្សប្រឆាំង តែយុវជនបក្សប្រជាជនកម្ពុជាមិនតបតនោះឡើយ។ ជាមួយគ្នានោះ គឺការប្រកាន់ខ្ជាប់នូវ គោលការណ៍បង្រួបបង្រួម គឺស្វាគមន៍រាល់ខ្មែរគ្រប់និន្នាការ ដែលចង់ចូលរួមរស់ជាមួយបក្សប្រជា ជនកម្ពុជា បើទោះបីពួកគេធ្លាប់វាយប្រហារយ៉ាងណាក៏ដោយ។
សម្រាប់ឯកឧត្តម បណ្ឌិត ហ៊ុន ម៉ាណែត គោលការណ៍សាមគ្គី និងការបង្រួបបង្រួមនេះ ជាគំរូវីរភាព របស់សម្តេចតេជោ ហ៊ុន សែន បានប្រើដើម្បីបង្រួបបង្រួមជាតិ និងបញ្ចប់ការបែកបាក់ជាតិ។ លោកបណ្ឌិត បានណែនាំឱ្យក្រុមការងារបន្តប្រកាន់យកនូវគោលការណ៍មួយនេះ។
ឯកឧត្តម បណ្ឌិត បានបង្ហាញការយល់ឃើញរបស់លោកថា ព្រោះតែគោលការណ៍ខាងលើទាំងអស់ នេះហើយ ធ្វើបក្សប្រជាជនកម្ពុជា ទទួលបានការគាំទ្រនៅក្រៅប្រទេសកាន់តែច្រើនឡើង៕
