(ម៉ូស្គូ)៖ លោក ឌីមីទ្រី មេដវេឌេវ ប្រធានគណបក្សរុស្ស៊ីរួបរួម បានផ្ញើសារជូនពរសម្តេចអគ្គមហាសេនាបតីតេជោ ហ៊ុន សែន ប្រធានគណបក្សប្រជាជនកម្ពុជា និងប្រធានព្រឹទ្ធសភានៃកម្ពុជា ក្នុងឱកាសខួបចម្រើនជន្មាយុរបស់សម្ដេចតេជោ នៅថ្ងៃទី០៥ ខែសីហា ឆ្នាំ២០២៥។
សារជូនពរបស់លោក ឌីមីទ្រី មេដវេឌេវ ប្រធានគណបក្សរុស្ស៊ីរួបរួម មានខ្លឹមសារដូចតទៅ៖ «គោរពជូនសម្តេច ហ៊ុន សែន, សូមសម្តែងនូវសេចក្តីអបអរសាទរដោយស្មោះក្នុងឱកាសខួបកំណើតរបស់សម្តេច! យើងខ្ញុំយល់ច្បាស់ថាសម្តេច ជាអ្នកគាំទ្រដល់ការអភិវឌ្ឍទំនាក់ទំនងកម្ពុជា-រុស្ស៊ី ដែលផ្អែកលើគោលការណ៍ នៃការជឿទុកចិត្ត និងមិត្តភាពគ្នាទៅវិញទៅមក។ យើងផ្តោតលើការលើកកម្ពស់កិច្ចសន្ទនារវាងគណបក្សរុស្ស៊ី រួបរួម និងគណបក្សប្រជាជនកម្ពុជា។ ខ្ញុំជឿជាក់ថា កិច្ចសហប្រតិបត្តិការអន្តរគណបក្សនយោបាយប្រកប ដោយស្ថាបនា ដែលរួមបញ្ចូលនូវបញ្ហាប្រយុទ្ធប្រឆាំងនឹងការអនុវត្តអាណានិគមន៍និយមបែបថ្មីទំនើប នឹងបន្តនូវការចូលរួមប្រកបដោយអត្ថន័យ ក្នុងការពង្រឹងទំនាក់ទំនងរវាងទីក្រុងម៉ូស្គូ និងភ្នំពេញ។
ខ្ញុំសូមជូនពរដោយស្មោះអស់ពីចិត្តដល់សម្តេចតេជោជាទីគោរព សូមមានសុខភាពល្អ សុភមង្គល និង ជោគជ័យថ្មីៗ នៅក្នុងគ្រប់ភារកិច្ច»៕
