(បេរូត)៖ សរសរបុរាណក្នុងតំបន់ចុះបញ្ជីដោយអង្គការយូណេស្កូ (UNESCO) នៅទីក្រុងកំពង់ផែ Tyre ប្រទេសលីបង់ បានរងការខូចខាត កន្លែងធម្មយាត្រាសម្រាប់អ្នកកាន់សាសនាឥស្លាម និងគ្រិស្តសាសនិក ត្រូវបានបំផ្លាញនៅទីក្រុងភាគខាងត្បូងមួយទៀត ខណៈអ៉ីស្រាអែល វាយប្រហារលើផ្សារតាំងពីសម័យ Mamluk ក្នុងទីក្រុង Nabatieh ហើយកងទ័ពបានវាយកម្ទេចទីប្រជុំជនព្រំដែនលីបង់ ដែលមានអាយុកាលរាប់សតវត្ស។ នេះបើយោងតាមការចេញផ្សាយដោយទីភ្នាក់ងារសារព័ត៌មាន Reuters នាថ្ងៃចន្ទ ទី២៩ ខែមិថុនា ឆ្នាំ២០២៦។
រដ្ឋមន្រ្តីក្រសួងវប្បធម៌លីបង់ លោក Ghassan Salame បានឱ្យដឹងថា ជិត ៤ខែនៃការប្រយុទ្ធតាមផ្លូវអាកាស និងជើងគោក ដែលកំណត់គោលដៅលើក្រុមហេសបូឡាគាំទ្រដោយអ៉ីរ៉ង់ បានបង្កការខូចខាត ឬបំផ្លិចបំផ្លាញតំបន់បេតិកភណ្ឌ នៅទូទាំងភាគខាងត្បូងលីបង់។ ទោះជាបីមានបទឈប់បាញ់តាំងពី ១សប្តាហ៍មុនមក អាជ្ញាធរមិនអាចចូលផ្តិតយករូបភាពនៃការខូចខាត ក្នុងតំបន់ប្រហែល ១០គីឡូម៉ែត្រនៃទឹកដីលីបង់ ដែលអ៉ីស្រាអែលកំពុងកាន់កាប់បានទេ។
តំបន់របស់លីបង់ដែលអ៉ីស្រាអែលកំពុងកាន់កាប់ រួមមានប្រាសាទមជ្ឈិមសម័យ Beaufort ក៏ដូចជាភូមិអាយុកាលរាប់សតវត្សន៍ ដែលជាជម្រកនៃអ្នកកាន់សាសនាគ្រិស្ត និងមូស្លីមទាំងពីរនិកាយ និងកន្លែងគោរពបូជារបស់ពួកគេ។ សូម្បីតែទីក្រុងបុរាណនៅក្រៅតំបន់កាន់កាប់ដោយអ៉ីស្រាអែល ក៏បានរងការវាយប្រហារតាមផ្លូវអាកាស រួមទាំងទីក្រុង Tyre និងទីក្រុង Nabatieh ផងដែរ។ តាមលោក Salame ការទម្លាក់គ្រាប់បែកយ៉ាងខ្លាំងលើទីក្រុង Tebnin ជំរុញឱ្យមានការភ័យខ្លាចថាបន្ទាយ Crusader ក៏អាចនឹងរងការខូចខាតផងដែរ។
ឆ្លើយតបនឹងសំណើសុំអត្ថាធិប្បាយពី Reuters យោធាអ៉ីស្រាអែលនិយាយថា ខ្លួនគ្មានបំណងបង្កការខូចខាតដល់ហេដ្ឋារចនាសម្ព័ន្ធស៉ីវិលនោះទេ ហើយការវាយប្រហារគឺសំដៅតែលើគោលដៅយោធាក្រុមហេសបូឡាប៉ុណ្ណោះ ជាមួយការគិតគូរអំពីសុវត្ថិភាពជនស៉ីវិល៕
