ខេត្តកំពង់ធំ ៖ នាថ្ងៃទី២៩ ខែកក្កដា ឆ្នាំ២០២៦នេះ ថ្នាក់ដឹកនាំក្រុមប្រឹក្សាខេត្ត ព្រមទាំងមន្ត្រីរាជការនៃរដ្ឋបាលខេត្ត និងមន្ទីរ-អង្គភាពជុំវិញខេត្តកំពង់ធំ បានរួមគ្នារៀបចំពិធីពុទ្ធសាសនាបូជា ដោយបានវេរប្រគេនទៀនចំណាំងព្រះវស្សា ទេយ្យទាន និងបច្ច័យ ជូនដល់ព្រះមេគណខេត្តទាំងពីរគណៈ (គណៈមហានិកាយ និងគណៈធម្មយុត្តិកនិកាយ) ព្រមទាំងព្រះអនុគណក្រុង-ស្រុក នៅវត្តឥន្ទ្រីយ៍សំវរៈ (ហៅវត្តកំពង់ធំ) ស្ថិតក្នុងក្រុងស្ទឹងសែន ខេត្តកំពង់ធំ។
ពិធីសាសនានេះ ត្រូវបានរៀបចំឡើងក្នុងគោលបំណងទ្រទ្រង់ដល់ព្រះសង្ឃ ដែលត្រូវគង់ចាំព្រះវស្សាអស់រយៈពេល៣ខែ តាមពុទ្ធានុញ្ញាត ស្របពេលដែលពិធីបុណ្យចូលព្រះវស្សា គឺជាប្រពៃណីសាសនាយ៉ាងសំខាន់មួយនៅក្នុងសង្គមកម្ពុជា ដែលស្តែងចេញពីកត្តាសទ្ធាជ្រះថ្លា និងការលើកកម្ពស់តម្លៃព្រះពុទ្ធសាសនា ដែលជាសាសនារបស់រដ្ឋ។
ពិធីនេះបានប្រព្រឹត្តទៅក្រោមបរិយាកាសយ៉ាងមហោឡារិក និងប្រកបដោយបរិស័ទសទ្ធាជ្រះថ្លា ដោយមានការអញ្ជើញចូលរួមពីសំណាក់ ឯកឧត្តម ប្រធានក្រុមប្រឹក្សាខេត្ត ថ្នាក់ដឹកនាំរដ្ឋបាលខេត្ត និងមន្ត្រីរាជការមកពីគ្រប់មន្ទីរជំនាញជុំវិញខេត្ត។ គ្រឿងទេយ្យទានដែលបានវេរប្រកែននាឱកាសនោះ រួមមាន ទៀនចំណាំងព្រះវស្សា សប្ភាយប្រកបដោយបច្ច័យបួន គ្រឿងឧបភោគបរិភោគ និងថវិកាមួយចំនួន ដើម្បីសម្រួលដល់កិច្ចបដិបត្តិធម៌ និងការផ្គត់ផ្គង់ចង្ហាន់របស់ព្រះសង្ឃក្នុងអំឡុងពេល៣ខែខាងមុខ។
ការប្រកែនទៀនព្រះវស្សា និងទេយ្យទាននាពេលនេះ មិនត្រឹមតែជាការបំពេញកុសលតាមជំនឿសាសនានោះទេ ប៉ុន្តែថែមទាំងបង្ហាញពីស្មារតីសាមគ្គីភាពយ៉ាងរឹងមាំរវាងពុទ្ធចក្រ និងអាណាចក្ររដ្ឋបាលស៊ីវិល ក្នុងការរួមគ្នាចែករំលែក ការពារ និងលើកស្ទួយបេតិកភណ្ឌវប្បធម៌អរូបីរបស់ជាតិ ឱ្យបានគង់វង្ស និងរីកចម្រើនតទៅមុខទៀត។
គួរបញ្ជាក់ថា ពិធីចូលព្រះវស្សា គឺជាកាលបរិច្ឆេទសាសនាយ៉ាងសំខាន់សម្រាប់ព្រះភិក្ខុសង្ឃក្នុងការសិក្សាអប់រំធម៌វិន័យ និងស្ដាប់ធម៌អប់រំចិត្ត ដោយផ្អាកការនិមន្តបិណ្ឌបាតចម្ងាយឆ្ងាយក្នុងរដូវវស្សា ចាប់ពីថ្ងៃ១រោច ខែអាសាឍ ដល់ថ្ងៃ១៥កើត ខែអស្សុជ៕ដោយ សឿង សុទ្ធ
