(ហ៊្សេរុយសាឡឹម)៖ កាលពីថ្ងៃអាទិត្យ ទី៩ ខែសីហា ឆ្នាំ២០២៦ នាយករដ្ឋមន្រ្តីនៃប្រទេសអ៉ីស្រាអែល លោក Benjamin Netanyahu បានច្រានចោលជាសាធារណៈចំពោះផែនការសន្តិភាព ដឹកនាំដោយសហរដ្ឋអាមេរិក ហើយគាំទ្រដោយក្រុមហាម៉ាស។ នេះបើតាមការចេញផ្សាយដោយ ទីភ្នាក់ងារព័ត៌មាន AFP។
លោក Netanyahu បាននិយាយថា អ៉ីស្រាអែលបដិសេធឯកសារ១៥ចំណុច ដោយសំដៅលើផែនការដែលក្រុមហាម៉ាសប៉ាឡេស្ទីន បានប្រកាសយល់ស្របកាលពីចុងខែកក្កដា។ លោកបានសង្កត់ធ្ងន់ថា យោធាអ៉ីស្រាអែលនឹងមិនដកទ័ពដាច់ខាត រហូតទាល់តែហាម៉ាសត្រូវបានរំសាយអាវុធទាំងស្រុង ហើយនឹងបន្តទប់ស្កាត់ការគំរាមកំហែងនានា មកលើកងកម្លាំងក៏ដូចជាប្រជាជនអ៉ីស្រាអែល។
លោកនាយករដ្ឋមន្រ្តីអ៉ីស្រាអែល បានហៅប្រធានាធិបតីអាមេរិក លោក ដូណាល់ ត្រាំ ថា ជាមិត្តដ៏អស្ចារ្យ ប៉ុន្តែលោកបញ្ជាក់ថា អ៉ីស្រាអែលកំពុងលើកពីជំហរជំទាស់របស់ខ្លួន ជាមួយទីក្រុងវ៉ាស៉ីនតោន។ លោក Netanyahu បាននិយាយដូច្នេះថា «ពួកគេមានគំនិតមួយចំនួន ដែលខ្លះយើងអាចទទួលយកបាន ប៉ុន្តែខ្លះទៀតវិញ គឺពុំអាចទទួលយកដាច់ខាត ហើយពួកយើងប្រកាន់ជំហររឹងមាំជុំវិញបញ្ហាទាំងនេះ»។ ទោះលោក Netanyahu បានប្រកាសបដិសេធបែបនេះក៏ដោយ យោធាអ៉ីស្រាអែល ត្រូវសង្កេតឃើញថា បានកាត់បន្ថយការវាយប្រហារនៅហ្កាហ្សា ចាប់តាំងពីថ្ងៃចន្ទដើមសប្តាហ៍មុន។
លោក Netanyahu ដែលជាមេដឹកនាំអ៉ីស្រាអែលកាន់អំណាចយូរបំផុត កំពុងមានសំឡេងគាំទ្រក្នុងកម្រិតប្រហាក់ប្រហែលគ្នា ឬក្រោមគូប្រជែងរបស់លោក ក្នុងការស្ទង់មតិមួយចំនួននាពេលកន្លងមកនេះ នៅមុនការបោះឆ្នោតសកលដែលគ្រោងប្រព្រឹត្តទៅនាថ្ងៃទី២៧ ខែតុលាខាងមុខ។ វាគឺជាការបោះឆ្នោតលើកដំបូងបំផុត គិតចាប់តាំងពីព្រឹត្តិការណ៍វាយប្រហារថ្ងៃទី៧ ខែតុលា ឆ្នាំ២០២៣ ដោយក្រុមហាម៉ាសលើអ៉ីស្រាអែល ដែលបាននាំឱ្យផ្ទុះសង្រ្គាមហ្កាហ្សា។ ការស្ទង់មតិទាំងនោះបង្ហាញឱ្យឃើញថា ផែនការសន្តិភាពរបស់អាមេរិក មិនមានការគាំទ្រឡើយក្នុងចំណោមក្រុមអ្នកគាំទ្រស្តាំនិយមរបស់លោក Netanyahu ហើយបណ្តាសមាជិកស្តាំនិយមក្នុងគណៈរដ្ឋមន្រ្តីរបស់លោក បាននាំគ្នាទទូចឱ្យរូបលោកកុំទទួលយកវា៕
