យោងតាម CNNនៅថ្ងៃចន្ទនេះបានឱ្យដឹងថា កងទ័ពអាកាសអាម៉េរិកកំពុងបញ្ជូនយន្ដហោះចម្បាំងបំបាំងកាយ F-22 ចំនួន ២៥គ្រឿងទៅកាន់តំបន់ប៉ាស៊ីហ្វិកភាគខាងលិចសម្រាប់ការធ្វើសមយុទ្ធនៅខែនេះ ដោយក្រុមអ្នកវិភាគហៅការដាក់ពង្រាយនេះថាជាការប៉ុនប៉ងដើម្បីបញ្ជូនសារបន្ទាន់ទៅកាន់ប្រទេសចិនចំពេលមានភាពតានតឹងនៅក្នុងតំបន់។
យន្តហោះ F-22 Raptorsដែលដាក់ពង្រាយពីកងឆ្មាំជាតិការពារអាកាសរដ្ឋហាវ៉ៃនិងមូលដ្ឋានរួមអែលមិនដូហ្វរីឆាតសុន នឹងធ្វើដំណើរទៅកាន់កោះក្វាមនិងកោះធីនៀនដែលជាផ្នែកមួយនៃសមយុទ្ធប្រតិបត្តិការប៉ាស៊ីហ្វិកដែកឆ្នាំ ២០២១ ។ យន្តហោះប្រយុទ្ធជំនាន់ទី ៥នេះត្រូវគេជឿថាជាយន្តហោះចម្បាំងទំនើបបំផុតរបស់ពិភពលោកដោយសារតែសមត្ថភាពរបស់ពួកវាក្នុងការគេចពីការចាប់បានរបស់រ៉ាដានិងអាចចូលរួមប្រព័ន្ធព័ត៌មាននៅលើនាវាឬក្រៅនាវាបាន។
យោងតាមទីបញ្ជាការដ្ឋានអាម៉េរិកឥណ្ឌូ-ប៉ាស៊ីហ្វិកបានឱ្យដឹងថាការហ្វឹកហាត់នេះត្រូវបានរៀបចំឡើងដើម្បីធ្វើឱ្យកងកម្លាំងក្នុងតំបន់របស់សហរដ្ឋអាម៉េរិក “កាន់តែមុតស្រួច កាន់តែឆាប់សម្រុះសម្រួលគ្នាបានលឿន និងកាន់តែមានភាពអត់ធន់”។មេបញ្ជាការកងទ័ពអាកាសប៉ាស៊ីហ្វិកឧត្តមសេនីយ៍ កេន វីលស្បាច់ បានប្រាប់ CNNថា សហរដ្ឋអាម៉េរិក “មិនដែលដាក់ពង្រាយយន្តហោះ Raptorsច្រើនបែបនេះនៅក្នុងតំបន់ប្រតិបត្តិការកងកម្លាំងអាកាសប៉ាស៊ីហ្វិកនោះឡើយ”។
យោងតាមស្ថិតិកងទ័ពអាកាសបានឱ្យដឹងថា សហរដ្ឋអាម៉េរិកមានយន្តហោះ F-22 ប្រហែល១៨០គ្រឿងនៅក្នុងកងនាវារបស់ខ្លួនដោយស្ទើរពាក់កណ្តាលនៃយន្តហោះទាំងនោះត្រៀមរួចជាស្រេចសម្រាប់ការដាក់ពង្រាយ។ អ្នកវិភាគផ្នែកការពារជាតិមានមូលដ្ឋាននៅរដ្ឋហាវ៉ៃលោក ខាល់ ស៊ូស្ទើ មុននេះបានប្រាប់ CNNថា ចិនមានយន្តហោះប្រយុទ្ធជំនាន់ទី ៥ ប្រមាណតែ ២០ ទៅ ២៤ គ្រឿងប៉ុណ្ណោះ។
លោកជឿថា ដូច្នេះការដាក់ពង្រាយយន្តហោះចម្បាំងធុន F-22 ប្រមាណ២៥ភាគរយរបស់អាម៉េរិកទៅកាន់តំបន់ដែលមានភាពច្របូកច្របល់ដែលចិននិងមហាអំណាចលោកខាងលិចកំពុងឈ្លោះប្រកែកគ្នាជុំវិញស្ថានភាពកោះតៃវ៉ាន់និងដែនសមុទ្រចិនខាងត្បូង គួរតែត្រូវបានគេមើលឃើញថាជាសារផ្ទាល់ទៅកាន់ប្រទេសចិន។
លោកស៊ូស្ទើនិយាយថា”កងទ័ពអាកាសប៉ាស៊ីហ្វិកកំពុងបង្ហាញថាខ្លួនអាចដាក់ពង្រាយយន្តហោះជំនាន់ទី៥បានច្រើនតាមដែលអាចធ្វើបានទៅកាន់សមរភូមិក្នុងរយៈពេលខ្លីជាងយន្តហោះចិនដែលមាននៅក្នុងឃ្លាំងទាំងមូលនាពេលបច្ចុប្បន្ន” ដោយកត់សម្គាល់ថាជាធម្មតាការដាក់ពង្រាយ F-22 មួយក្រុមមានតែ ៦ ទៅ ១២ យន្ដហោះប៉ុណ្ណោះ។
អ្នកវិភាគរូបនេះបានបន្ថែមថា”ការបង្ហាញពីសមត្ថភាពប្រយុទ្ធរបស់កងទ័ពអាកាសអាម៉េរិកបានបញ្ជូនសញ្ញារារាំងយ៉ាងខ្លាំងក្លាដល់ប្រទេសចិននិងពង្រឹងដល់សម្ពន្ធមិត្តនិងដៃគូរបស់អាម៉េរិក។ ចិននឹងព្យាយាមតាមដានអាម៉េរិកយ៉ាងដិតដល់បំផុត”៕
