មេដឹកនាំកំពូលកូរ៉េខាងជើង បាននិយាយថា ការស្នើពីសំណាក់សហរដ្ឋអាមេរិក ឲ្យរៀបចំកិច្ច ចរចាឡើងវិញ នោះ គឺជារឿង «ក្លែងក្លាយ»

 (ប៉េកាំង)៖ យោងតាមការចេញផ្សាយដោយ សារព័ត៌មានចិន CGTN នៅព្រឹកថ្ងៃព្រហស្បតិ៍ ទី៣០ ខែកញ្ញា ឆ្នាំ២០២១ បញ្ជាក់ថា មេដឹកនាំកំពូលកូរ៉េខាងជើង លោក គីម ជុងអ៊ុន បានថ្កោលទោស ការស្នើពីសំណាក់សហរដ្ឋអាមេរិក ឲ្យរៀបចំកិច្ចចរចាឡើងវិញនោះថាជារឿង «ក្លែងក្លាយ» ដើម្បី បំភ័ន្តភ្នែកសហគមន៍អន្តរជាតិ ពីនយោបាយអរិយភាពរបស់ខ្លួនតែប៉ុណ្ណោះ។

លោក គីម ជុងអ៊ុន ធ្វើការកត់សម្គាល់បែបនេះនៅឯសម័យប្រជុំលើកទី ៥ នៃសភាកំពូលប្រជាជន កូរ៉េខាងជើងនីតិកាលទី ១៤ ដែលឈានចូលថ្ងៃទី២ហើយ សម្រាប់ថ្ងៃព្រហស្បតិ៍នេះ។ សម័យប្រជុំនេះប្រព្រឹត្តិទៅក្នុងគោលបំណងពិភាក្សាពីនយោបាយ, សេដ្ឋកិច្ច និងរបៀបវារៈសំខាន់ របស់ប្រទេស។

នៅក្នុងឱកាសនោះ លោក គីម បានបញ្ជាក់ថា «សហរដ្ឋអាមេរិកនៅតែបន្តលើកឡើង ម្ដងហើយម្ដង ទៀតពីនយោបាយការទូត និងការរៀបចំកិច្ចចរចាដោយគ្មានលក្ខខណ្ឌ។ ប៉ុន្តែនេះគ្រាន់តែជាលេសបិទបាំងសហគមន៍អន្តរជាតិ ពីនយោបាយអរិភាពរបស់ខ្លួន ចំពោះកូរ៉េខាង ជើងតែប៉ុណ្ណោះ»។

តែទោះជាយ៉ាងនេះក្ដី បើតាមទូរទស្សន៍រដ្ឋកូរ៉េខាងជើង KCNA លោក គីម ជុងអ៊ុន បាននិយាយថា ខ្សែទូរស័ព្ទទំនាក់ទំនងជាមួយកូរ៉េខាងត្បូង អាចនឹងត្រូវស្ដារឡើងនៅខែតុលាខាងមុខនេះ ក្នុង ចេតនាសម្រេចឱ្យបាននូវបំណងប្រាថ្នា របស់ប្រជាជាតិកូរ៉េទាំងមូល ដែលចង់បានសន្តិភាពជាដរាប នៅលើឧបទ្វីបកូរ៉េ៕