(ញូដេលី)៖ នេះបើយោងតាមការចេញ ផ្សាយដោយទីភ្នាក់ងារសារព័ត៌មាន Reuters នៅថ្ងៃសុក្រ ទី២៤ ខែធ្នូ ឆ្នាំ២០២១បញ្ជាក់ថា នាយករដ្ឋមន្ត្រីឥណ្ឌា លោក ណារិនដ្រា ម៉ូឌី (Narendra Modi) នៅថ្ងៃព្រហស្បតិ៍ សប្ដាហ៍នេះ បានស្នើឱ្យបណ្ដារដ្ឋនានានៅទូទាំងប្រទេស បង្កើនការផ្គត់ផ្គង់អុក ស៊ីសែន និងពង្រឹងហេដ្ឋារចនាសម្ពន្ធសុខាភិបាល ដើម្បីទប់ស្កាត់ការកើនឡើងនៃករណីឆ្លង COVID-19 ដែលបង្កឡើងដោយវីរុសបំប្លែងថ្មី Omicron នៅមុនរដូវកាលបុណ្យនានា ចូលមកដល់ ខណៈដែលការប្រមូលផ្តុំគ្នានៅតាមទីសាធារណៈ និងទីផ្សារមានការកើនឡើងគួរឱ្យកត់សម្គាល់។
នៅថ្ងៃព្រហស្បតិ៍នេះ ក្រសួងសុខាភិបាលឥណ្ឌា បានរាយការណ៍ពីការរកឃើញករណីឆ្លងវីរុស បំប្លែងថ្មី Omicron ថ្មីៗចំនួន ១៦ករណីបន្ថែមទៀតក្នុងរយៈពេល ២៤ម៉ោងចុងក្រោយនេះ ដែល ច្រើនជាងពីរដង បើធៀបទៅនឹងកាលពីសប្តាហ៍មុន នាំឱ្យចំនួនករណីឆ្លងសរុប នៃមេរោគបំប្លែង ថ្មីនេះនៅទូទាំងប្រទេសកើនឡើងដល់ ២៣៦ករណី។
រដ្ឋាភិបាលឥណ្ឌាបាននិយាយនៅក្នុងសេចក្តីថ្លែងការណ៍មួយថា «នាយករដ្ឋមន្ត្រីបានណែនាំក្រុមមន្រ្តីឱ្យធានាថា ប្រព័ន្ធសុខាភិបាលនៅក្នុងរដ្ឋនានាចាប់ផ្តើមពីថ្នាក់ស្រុក ត្រូវបានពង្រឹងដើម្បីឆ្លើយតបនឹង បញ្ហាប្រឈមណាមួយដែលបង្កឡើងដោយវីរុសបំប្លែងថ្មី Omicron ដែលវាមានសារៈសំខាន់ណាស់ សម្រាប់រដ្ឋនានាក្នុងការធានាថា ឧបករណ៍ផ្គត់ផ្គង់អុកស៊ីសែនត្រូវបានតំឡើងរួចរាល់ និងប្រើប្រាស់ បានយ៉ាងល្អ»៕
