កូរ៉េខាងត្បូងថា នឹងប្រឹងប្រែងជួយកូរ៉េខាងជើង ប្រយុទ្ធប្រឆាំងកូវីដ-១៩ ឱ្យអស់ពីសមត្ថភាព

 (សេអ៊ូល)៖  តាមការចេញផ្សាយដោយទីភ្នាក់ងារសារព័ត៌មាន Reuters នៅថ្ងៃចន្ទ ទី១៦ ខែ ឧសភា ឆ្នាំ២០២២ គឺប្រធានាធិបតីកូរ៉េខាងត្បូង លោក យូន ស៊ុក យុល (Yoon Suk-yeol) បាន និយាយថាប្រទេសរបស់លោកនឹងប្រឹងប្រែងឱ្យអស់ពីសមត្ថភាព ដើម្បីជួយកូរ៉េខាងជើង ក្នុងការ ប្រយុទ្ធប្រឆាំងនឹងការឆ្លងរាលដាល COVID-19 ហើយនៅតែបន្តបើកចំហទ្វារជំនួយ មនុស្សធម៌ សម្រាប់ទីក្រុងព្យុងយ៉ាង។

លោក យូន ស៊ុក យុល ធ្វើការកត់សម្គាល់ខាងលើនៅក្នុងសុន្ទរកថាមួយនៅឯសម័យប្រជុំសភាពេញ អង្គ នៅថ្ងៃចន្ទនេះ។ ថ្លែងនាឱកាសនោះ លោក យូន បានគូសបញ្ជាក់ដូច្នេះថា «ប្រសិនបើកូរ៉េខាង ជើង ស្នើឱ្យសុំជំនួយពីពួកយើង យើងនឹងប្រឹងប្រែងឱ្យអស់ពីសមត្ថភាពក្នុងការផ្ដល់ថ្នាំពេទ្យ ក្នុងនោះ រួមមានទាំងវ៉ាក់សាំងបង្ការ COVID-19, បរិក្ខារពេទ្យ និងបុគ្គលិកសុខាភិបាលផងដែរ»។

សូមជម្រាបថា នៅក្នុងសុន្ទរកថាខាងលើដដែល លោក យូន ក៏បានសង្កត់ធ្ងន់ដែរថាលោកនឹង ពិភាក្សាជាមួយប្រធានាធិបតីអាមេរិក លោក ចូ បៃដិន ស្ដីពី ការពង្រឹងកិច្ចសហប្រតិបត្តិការលើ ខ្សែចង្វាក់ផ្គត់ផ្គង់សកល នៅក្រោមផែនការសេដ្ឋកិច្ចឥណ្ឌូ-ប៉ាស៊ីហ្វិក (Indo-Pacific Economic Framework) ខណៈ លោក ចូ បៃដិនគ្រោងនឹងបំពេញទស្សនកិច្ចមកកាន់កូរ៉េខាងត្បូង នៅក្នុង​សប្ដាហ៍នេះ៕