អ៊ុយក្រែន ទទូចចង់បានមីស៊ីលរយៈចម្ងាយឆ្ងាយ និងរថក្រោះធុនធ្ងន់ ដើម្បីយកឈ្នះរុស្ស៉ី ក្នុងឆ្នាំ២០២៣នេះ

 (កៀវ)៖  តាមការដកស្រង់ចេញផ្សាយពីទីភ្នាក់ងារសារព័ត៌មាន AFP​ នៅថ្ងៃព្រហស្បតិ៍ ទី១២ ខែមករា ឆ្នាំ២០២៣ ប្រាប់អោយដឆងថា ទីប្រឹក្សាជាន់ខ្ពស់ម្នាក់របស់ប្រធានាធិបតីអ៊ុយក្រែន លោក មីខៃឡូ ប៉ូដុលយ៉ាក់ (Mykhaylo Podolyak) បាននិយាយថាអ៊ុយក្រែនអាចនឹងទទួលបានជ័យជម្នះ លើរុស្ស៉ី នៅក្នុងឆ្នាំ២០២៣នេះ ប្រសិនបើខ្លួនទទួលបានអាវុធបន្ថែមពីលោកខាងលិច ជាពិសេស គឺមីស៊ីលរយៈចម្ងាយឆ្ងាយ និងរថក្រោះធុនធ្ងន់។

នៅក្នុងបទសម្ភាសន៍ជាមួយ AFP នៅថ្ងៃពុធសប្ដាហ៍នេះ លោក ប៉ូដុលយ៉ាក់ ក៏បានបញ្ជាក់ដែរថា ប្រសិនបើមិនមានអាវុធទាំងនេះទេ នោះសង្រ្គាមអាចនឹងអូសបន្លាយ ដល់រាប់ទសវត្សរ៍ ខណៈការ វាយប្រហារយុទ្ធគ្នាយ៉ាងបង្ហូរឈាមកំពុងកើតឡើងនៅក្នុងទីក្រុងបាកមូត (Bakhmut) និងទីក្រុង សូឡេដា (Soledar) ស្ថិតនៅភាគខាងកើត នៃប្រទេស។ លោក ប៉ូដុលយ៉ាក់ បានសង្កត់ធ្ងន់បន្ថែម ដូច្នេះថា «មានតែមីស៊ីលដែលអាចបាញ់បានចម្ងាយ១០០គីឡូម៉ែត្រឡើងទៅប៉ុណ្ណោះ ដែលអាចជួយ យើងពន្លឿន ការរំដោះទឹកដីរបស់យើងមកវិញ»។

គួរបញ្ជាក់ថា សហរដ្ឋអាមេរិក កាលពីឆ្នាំ២០២២ បានផ្គត់ផ្គង់ឱ្យអ៊ុយក្រែន នូវប្រព័ន្ធមីស៊ីលដែល អាចបាញ់បានចម្ងាយ ៨០គីឡូម៉ែត្រ ដែលបានជួយឱ្យអ៊ុយក្រែនទទួល បានជ័យជម្នះនៅក្នុងសម រភូមិនៅតំបន់ខាកៀវ និងតំបន់ខឺសុន។ កាលពីពេលថ្មីៗនេះ អ៊ុយក្រែនក៏ទទួលបានប្រព័ន្ធមីស៊ីល ស្រដៀងគ្នានេះពីបារាំងដែរ ប៉ុន្តែទីក្រុងកៀវ នៅតែបន្តទទូចឱ្យសហរដ្ឋអាមេរិកបញ្ជូនប្រព័ន្ធមីស៊ីល ATACMS ដែលអាចបាញ់បានចម្ងាយជាង ៣០០គីឡូម៉ែត្រ មកឱ្យទាហានរបស់ខ្លួន៕