(តៃប៉ិ)៖ យោងតាមការចុះផ្សាយដោយទីភ្នាក់ងារសារព័ត៌មាន AFP នៅថ្ងៃព្រហស្បតិ៍ ទី២៧ ខែកក្កដា ឆ្នាំ២០២៣ បានបញ្ជាក់ថា អាជីវកម្ម និងសាលារៀន នៅភាគខាងត្បូងកោះតៃវ៉ាន់ ត្រូវបិទទ្វារជាបណ្តោះអាសន្ន នៅព្រហស្បតិ៍នេះ ហើយក្រុមហ៊ុនអាកាសចរណ៍ បានលុបចោល ជើងហោះហើរក្នុងស្រុករាប់រយ ចំពេលមានការព្រមានពីបំណាក់ដី ទឹកជំនន់ ខណៈព្យុះទីហ្វុង ដុកស៊ូរី (Doksuri) បានបោកបក់មកលើ កោះនេះ និងបន្តឆ្ពោះទៅកាន់ប្រទេសចិននាចុងសប្តាហ៍ នេះ។ ការិយាល័យអាកាសធាតុរបស់កោះតៃវ៉ាន់ បានចេញការព្រមានអំពីខ្យល់ខ្លាំង និងភ្លៀង ធ្លាក់សម្រាប់ផ្នែកភាគខាងត្បូង ដែលរួមទាំងទីក្រុងកៅស៊ុង (Kaohsiung) ជាទីក្រុងកំពង់ផែដ៏ សំខាន់មួយ។ មនុស្សជាង ៤,០០០នាក់ត្រូវបានជម្លៀសចេញ ដោយភាគច្រើនជាអ្នករស់នៅតំបន់ ភ្នំភាគខាងត្បូង និងភាគខាងកើតនៃកោះតៃវ៉ាន់ ដែលមានភ្លៀងធ្លាក់កម្រិតជិត ០.៧ម៉ែត្រនៅក្នុង តំបន់ខ្លះ និងភ្លៀងកម្រិតរហូតដល់ ១ម៉ែត្រត្រូវបានព្យាករទុក។
ជើងហោះហើរក្នុងស្រុកទាំងអស់ត្រូវបានផ្អាករីឯជើងហោះហើរអន្តរជាតិមួយចំនួនត្រូវបានលុបចោល។ រីឯសេវាកម្មផ្លូវដែករវាងភាគខាងត្បូង និងភាគខាងកើតតៃវ៉ាន់ ក៏ត្រូវបានបិទផងដែរ។ ព្យុះនេះបានកាត់ផ្តាច់ចរន្តអគ្គិសនីរបស់ពលរដ្ឋជាង ១៥,៧០០គ្រួសារនៅទូទាំងកោះតៃវ៉ាន់ ប៉ុន្តែ ភាគច្រើនត្រូវបានស្តារឡើងវិញ។
គិតត្រឹមម៉ោង ៨៖៣០នាទីព្រឹក ថ្ងៃព្រហស្បតិ៍ (ម៉ោងនៅតៃវ៉ាន់) ព្យុះទីហ្វុង Doksuri ត្រូវបានចាត់ ថ្នាក់ជា ព្យុះទីហ្វុងខ្លាំងកម្រិតលេខ២ ដោយកំពុងបក់បោកឆ្ពោះទៅភាគខាងត្បូងកោះតៃវ៉ាន់ ក្នុងល្បឿនខ្យល់អតិបរមា ១៩១គីឡូម៉ែត្រក្នុងមួយម៉ោង៕
