(ណៃពិដោ)៖ យោងតាមការចេញផ្សាយដោយទីភ្នាក់ងារសារព័ត៌មាន Reuters នៅថ្ងៃអង្គារ ទី១៤ ខែវិច្ឆិកា ឆ្នាំ២០២៣ អោយដឹងថា អ្នកស្រុក ក្រុមចលនាតស៊ូ និងមន្ត្រីម្នាក់ បាននិយាយថា ចលនាតស៊ូប្រដាប់អាវុធ ជនជាតិភាគតិច បានវាយប្រហារលើប៉ុស្តិ៍សន្តិសុខ ជាច្រើនកន្លែង ក្នុង ប្រទេសមីយ៉ាន់ម៉ា កាលពីថ្ងៃចន្ទសប្តាហ៍នេះ ខណៈការប្រយុទ្ធគ្នាបានផ្ទុះឡើងនៅសមរភូមិ ២ថ្មី ទៀត ដោយបង្ខំឱ្យមនុស្សរាប់ពាន់ នាក់បាននាំគ្នាឆ្លងចូលទៅប្រទេសជិតខាង គឺឥណ្ឌាដើម្បី សុវត្ថិភាព។
អ្នកនាំពាក្យរបស់ចលនាប្រដាប់អាវុធ Arakan Army (AA) លោក Khine Thu Kha បាននិយាយ ថា សម្ព័ន្ធមិត្តមួយក្នុងចំណោមចលនាតស៊ូចំនួន ៣ គឺកងទ័ព Arakan Army ដែលកំពុងប្រយុទ្ធ ដើម្បីស្វ័យភាពនៅក្នុងរដ្ឋ Rakhine ភាគខាងលិចប្រទេសមីយ៉ាន់ម៉ា បានដណ្តើមយកទីតាំង មួយចំនួន ក្នុងតំបន់ Rathedaung និង Minbya ស្ថិតនៅចម្ងាយប្រហែល ២០០គីឡូម៉ែត្រពីគ្នា។ អ្នកស្រុកម្នាក់ក្នុងតំបន់ Rathedaung បាននិយាយថា ស្នូរកាំភ្លើងត្រូវបានឮនៅមុនថ្ងៃរះ នៅថ្ងៃចន្ទ (ម៉ោងក្នុងតំបន់) អមដោយការទម្លាក់គ្រាប់បែករយៈពេលជាច្រើនម៉ោង ហើយយោធាក៏បានបិទផ្លូវ ចូលមកក្នុងតំបន់ ព្រមជាមួយនឹងការពង្រឹងកម្លាំងឈរជើង។
មន្ត្រីឥណ្ឌាមួយរូប និងប្រភពពីរទៀត បានឲ្យថា ការប្រយុទ្ធគ្នាក៏បានផ្ទុះឡើងនៅក្នុងរដ្ឋ Chin ដែល មានព្រំប្រទល់ជាប់ប្រទេសឥណ្ឌា នៅពេលដែល ក្រុមបះបោរ វាយប្រហារលើជំរុំ យោធាចំនួនពីរ។ មនុស្សប្រហែល ៥,០០០នាក់ មកពីមីយ៉ាន់ម៉ាបានឆ្លងចូលទៅក្នុងរដ្ឋ Mizoram របស់ឥណ្ឌាដើម្បី ស្វែងរកទីជម្រក។
គួរបញ្ជាក់ថា រដ្ឋ Chin ដែលធ្លាប់តែមានសន្តិភាពច្រើនឆ្នាំមកហើយ បានឃើញមានការប្រយុទ្ធគ្នា យ៉ាងខ្លាំងក្រោយរដ្ឋប្រហារឆ្នាំ២០២១ ដោយប្រជាជន រាប់ពាន់នាក់ប្រដាប់ដោយអាវុធប្រឆាំងនឹង រដ្ឋាភិបាលយោធា។ អ្នកនាំពាក្យរបបយោធាមីយ៉ាន់ម៉ា មិនបានឆ្លើយតបភ្លាមៗទេ ចំពោះការផ្ញើរ សារដើម្បី សុំការអត្ថាធិប្បាយអំពីការប្រយុទ្ធគ្នាថ្មីចុងក្រោយនេះ៕
