(សេអ៊ូល)៖ យោងតាមប្រព័ន្ធផ្សព្វផ្សាយរដ្ឋកូរ៉េខាងជើង ដកស្រង់ចេញផ្សាយដោយ ទីភ្នាក់ងារ សារព័ត៌មាន AFP នៅថ្ងៃព្រហស្បតិ៍ ទី២១ ខែធ្នូ ឆ្នាំ២០២៣ បញ្ជាក់ថា មេដឹកនាំកូរ៉េខាងជើង លោក គីម ជុងអ៊ុន បានគំរាមថាទីក្រុងព្យុងយ៉ាង នឹងមិនស្ទាក់ស្ទើរឡើយក្នុងការបើកការវាយប្រហារ ដោយ ប្រើអាវុធនុយក្លេអ៊ែរ ប្រសិនបើរងការគំរាមកំហែងនុយក្លេអ៊ែរពីសត្រូវ។ ការគំរាមរបស់លោក គីម ជុងអ៊ុន ធ្វើឡើងបន្ទាប់ពីសហរដ្ឋអាមេរិក និងកូរ៉េខាងត្បូងបើកកិច្ចប្រជុំមួយកាលពីសប្ដាហ៍មុន ក្នុងទីក្រុងវ៉ាស៊ីនតោន ជាទីដែលពួកគេពិភាក្សាពីលទ្ធភាពប្រើអាវុធនុយក្លេអ៊ែរ ក្នុងករណីសង្រ្គាម ជាមួយកូរ៉េខាងជើងផ្ទុះឡើង។ កិច្ចប្រជុំនេះក៏មានរួមបញ្ចូលដែរពី កិច្ចពិភាក្សាស្ដីពីផែនការយុទ្ធ សាស្ត្រ និងនុយក្លេអ៊ែរ ហើយទីក្រុងវ៉ាស៊ីនតោនថែមទាំងព្រមានទៀតផងថាការវាយប្រហារដោយ អាវុធនុយក្លេអ៊ែរ ណាមួយរបស់ទីក្រុងព្យុងយ៉ាងលើសហរដ្ឋអាមេរិក ឬសម្ព័ន្ធមិត្តរបស់អាមេរិក នោះវានឹងនាំទៅរកថ្ងៃអវសាននៃរបបដឹកនាំលោក គីម ជុងអ៊ុន។
តែទោះជាបែបនេះក្ដី លោក គីម ជុងអ៊ុន បានប្រាប់កងកម្លាំងមីស៊ីលនៃយោធាកូរ៉េខាងជើង កុំស្ទាក់ ស្ទើរឱ្យសោះក្នុងការបើកការវាយប្រហារដោយ ប្រើអាវុធនុយក្លេអ៊ែរ នៅពេលដែលសត្រូវហ៊ាន រករឿងជាមួយអាវុធនុយក្លេអ៊ែរ។
គួរបញ្ជាក់ថា កូរ៉េខាងជើង កាលពីថ្ងៃចន្ទដើមសប្ដាហ៍នេះ បានបាញ់សាកល្បងមីស៊ីលបាលិស្ទីគ អន្តរទ្វីប ICBM មួយគ្រាប់ប្រើឥន្ធនៈរឹង Hwasong-18 ហើយថាការធ្វើតេស្ដនេះគឺជាសារព្រមាន មួយប្រឆាំងនឹងអ្វីដែលទីក្រុងព្យុងយ៉ាងចាត់ទុកថាជាការគំរាមកំហែងយោធាពីសំណាក់ សហរដ្ឋ អាមេរិក និងសម្ព័ន្ធមិត្តរបស់អាមេរិក៕
