(ស្វាយរៀង)៖ ក្រសួងព័ត៌មាន បានរួមសហការជាមួយអគ្គលេខាធិការដ្ឋាននៃអាជ្ញាធរជាតិប្រយុទ្ធប្រឆាំងគ្រឿងញៀន នៅព្រឹកថ្ងៃទី១៨ ខែវិច្ឆិកា ឆ្នាំ២០២៥ បានបើកយុទ្ធនាការផ្សព្វផ្សាយអប់រំ ស្តីពីបញ្ហាគ្រឿងញៀន នៅទីរួមខេត្តស្វាយរៀង។
ពិធីនេះបានធ្វើឡើងក្រោមវត្តមានលោក ឡុង សេង អនុរដ្ឋលេខាធិការក្រសួងព័ត៌មាន និងមានសមាសភាពចូលរួមពីអគ្គលេខាធិការដ្ឋាននៃអាជ្ញាធរជាតិប្រយុទ្ធប្រឆាំងគ្រឿងញៀន, ថ្នាក់ដឹកនាំរដ្ឋបាលខេត្ត, មន្រ្តីរាជការ, កងកម្លាំងប្រដាប់អាវុធ, លោកគ្រូ អ្នកគ្រូ, សិស្សានុសិស្ស និងយុវជន យុវនារី ចំនួនប្រហែលជាង ៥០០នាក់។
នាឱកាសនោះដែរ លោក ឡុង សេង បានថ្លែងថា សភាពការណ៍គ្រឿងញៀនទាំងតំបន់ និងសកលលោក នៅតែបន្តវិវត្តន៍ប្រែប្រួលគួរឱ្យព្រួយបារម្ភ ហើយកម្ពុជាបានទទួលរងឥទ្ធិផលពីការវិវត្តន៍នេះ ឆ្លើយតបទៅនឹងបញ្ហានេះ រាជរដ្ឋាភិបាលកម្ពុជា បានដាក់ឱ្យអនុវត្តផែនការយុទ្ធសាស្រ្តប្រយុទ្ធប្រឆាំងគ្រឿងញៀនមានចំនួន ១០លើ, សារាចរណែនាំ និងបទបញ្ជាផ្សេងៗ សំដៅដល់ការធ្វើយ៉ាងណារួមគ្នាជាចលនាជាតិមួយក្នុងការប្រយុទ្ធប្រឆាំងគ្រឿងញៀន ដើម្បីកសាងសហគមន៍គ្មានគ្រឿង។
លោក ឡុង សេង បានបន្តថា ការងារផ្សព្វផ្សាយអប់រំជាកិច្ចការអាទិភាព និងត្រូវបានចាត់ទុកថាជាយន្តការដ៏មានប្រសិទ្ធក្នុងការបង្ការ ទប់ស្កាត់ និងប្រយុទ្ធប្រឆាំងគ្រឿងញៀន ដែលកន្លងមកមានស្ថានីយ៍ទូរទស្សន៍ វិទ្យុ សិល្បករ-សិល្បការិនី ពិធីករ-ពិធីការិនី អ្នកផលិតមាតិកា បានចូលរួមចំណែកយ៉ាងសកម្មក្នុងការបញ្ជ្រាបនូវការយល់ដឹងអំពីបញ្ហាគ្រឿងញៀន ទៅកាន់គ្រប់មជ្ឈដ្ឋាន។
មន្ត្រីជាន់ខ្ពស់ក្រសួងព័ត៌មាន បានឱ្យដឹងថា គោលបំណងនេះដើម្បីបន្តជំរុញស្មារតី និងចលនាជាតិតែមួយ ដើម្បីចូលរួមផ្សព្វផ្សាយ អប់រំ ឱ្យបានសកម្មគ្រប់មជ្ឈដ្ឋាន អំពីផលប៉ះពាល់ និងវិនាសកម្មនៃគ្រឿងញៀន ដោយម្នាក់ៗមិនពាក់ព័ន្ធនឹងគ្រឿងញៀន៕
