(ឡាអេ)៖ ចៅក្រមសាលាឧទ្ធរណ៍នៅតុលាការព្រហ្មទណ្ឌអន្តរជាតិ ICC កាលពីថ្ងៃចន្ទសប្តាហ៍នេះ បានបដិសេធបណ្តឹងមួយក្នុងចំណោមបណ្តឹងផ្លូវច្បាប់បន្តបន្ទាប់ ដែលអ៉ីស្រាអែលបានដាក់ ដើម្បីប្រឆាំងនឹងការស៉ើបអង្កេតរបស់តុលាការ ជុំវិញសង្គ្រាមអ៉ីស្រាអែលក្នុងតំបន់ហ្កាហ្សា។ នេះបើយោងតាមការចេញផ្សាយដោយទីភ្នាក់ងារសារព័ត៌មាន Reuters នាថ្ងៃអង្គារ ទី១៦ ខែធ្នូ ឆ្នាំ ២០២៥។
នៅក្នុងបណ្តឹងឧទ្ធរណ៍ ចៅក្រម សម្រេចមិនលុបចោលសេចក្តីសម្រេចរបស់តុលាការជាន់ទាប ដែលថាការស៉ើបអង្កេតរបស់អយ្យការលើបទឧក្រិដ្ឋ ដែលត្រូវបានចោទប្រកាន់ក្រោមយុត្តាធិការរបស់ខ្លួន អាចរួមបញ្ចូលព្រឹត្តិការណ៍ដែលកើតឡើង ក្រោយការវាយប្រហារដ៏សាហាវលើទឹកដីអ៉ីស្រាអែល ពីសំណាក់ក្រុមហាម៉ាសប៉ាឡេស្ទីន នាថ្ងៃទី៧ ខែតុលា ឆ្នាំ ២០២៣។ មានន័យថា ការស៉ើបអង្កេតនឹងនៅតែបន្ត ហើយដីកាចាប់ខ្លួនឆ្នាំមុន សម្រាប់លោក Benjamin Netanyahu នាយករដ្ឋមន្ត្រីអ៉ីស្រាអែល និងអតីតរដ្ឋមន្ត្រីការពារជាតិរបស់លោក គឺលោក Yoav Gallant គឺនៅតែមានសុពលភាព។
ក្រសួងការបរទេសអ៉ីស្រាអែល ចាត់ទុកសេចក្តីសម្រេចនេះថា ជាឧទាហរណ៍នៃភាពមិនអើពើរបស់ ICC ចំពោះសិទ្ធិអធិបតេយ្យភាពរបស់ប្រទេសមួយ ដែលមិនមែនជាសមាជិក ICC។ អ៉ីស្រាអែល ថាមិនទទួលស្គាល់យុត្តាធិការរបស់ ICC ឡើយ ហើយបដិសេធប្រព្រឹត្តឧក្រិដ្ឋកម្មសង្គ្រាមនៅហ្កាហ្សា ជាទីដែលខ្លួននិយាយថា យុទ្ធនាការយោធាគឺមានគោលបំណងកម្ចាត់ក្រុមហាម៉ាស បន្ទាប់ពីការវាយប្រហារថ្ងៃទី៧ ខែតុលា៕
