ខេត្តកោះកុង៖នៅពេលថ្មីៗនេះ លោក សុខ ភិរម្យ អភិបាល នៃគណៈអភិបាលស្រុកមណ្ឌលសីមា បានដឹកនាំក្រុមការងាររដ្ឋបាលមូលដ្ឋាន រួមមានលោកមេឃុំ និងមេភូមិ ក្នុងតំបន់ទួលគគីរ អមដំណើរ ឯកឧត្តម ដាញ់ សេរី អគ្គនាយកដ្ឋានគាំពារ នៃ ក្រសួងបរិស្ថាន ដើម្បីចុះពិនិត្យ និងវាយតម្លៃទីតាំងសម្រាប់គម្រោងគ្រប់គ្រងសំណល់រឹងនៅក្នុងតំបន់។
សកម្មភាពនេះបានប្រព្រឹត្តទៅនៅភូមិទួលគគីលើ ឃុំទួលគគីរ ស្ថិតក្នុង ស្រុកមណ្ឌលសីមា ដែលជាតំបន់កំពុងមានការរីកចម្រើនខាងសេដ្ឋកិច្ច និងប្រជាជនកើនឡើង។ គោលបំណងសំខាន់នៃការចុះពិនិត្យគឺ ដើម្បីរៀបចំទីតាំងសម្រាប់ការបង្កើតទីលានទុកដាក់សំរាម និងគ្រប់គ្រងសំណល់រឹងប្រកបដោយស្តង់ដារ បរិស្ថាន និងសុខាភិបាលសាធារណៈ។
ក្នុងឱកាសនោះ លោកអភិបាលស្រុក បានបញ្ជាក់ថា ការគ្រប់គ្រងសំណល់រឹង គឺជាបញ្ហាសំខាន់មួយដែលទាក់ទងដោយផ្ទាល់ទៅនឹងសុខភាពប្រជាពលរដ្ឋ និងការពារបរិស្ថានក្នុងតំបន់។ លោកបានបន្ថែមថា ការរៀបចំទីតាំងទុកដាក់សំរាមត្រឹមត្រូវ និងមានប្រព័ន្ធគ្រប់គ្រងល្អ នឹងជួយកាត់បន្ថយការបំពុលដី ទឹក និងខ្យល់ ព្រមទាំងលើកកម្ពស់ភាពស្អាតស្អំ និងសុវត្ថិភាពសហគមន៍។
ជាមួយគ្នានេះ ឯកឧត្តមអគ្គនាយកដ្ឋានគាំពារ បានលើកឡើងពីសារៈសំខាន់នៃការអនុវត្តគោលនយោបាយបរិស្ថានរបស់រាជរដ្ឋាភិបាល ដែលផ្តោតលើការអភិវឌ្ឍប្រកបដោយចីរភាព (Sustainable Development) និងការរួមចំណែករបស់អាជ្ញាធរមូលដ្ឋានក្នុងការអនុវត្តន៍គម្រោងជាក់ស្តែង។ លោកក៏បានណែនាំឲ្យមានការសហការជិតស្និទ្ធរវាងអាជ្ញាធរ មន្ត្រីបច្ចេកទេស និងប្រជាពលរដ្ឋ ដើម្បីធានាថាគម្រោងនេះអាចដំណើរការបានយ៉ាងមានប្រសិទ្ធភាព និងមានភាពចីរភាពក្នុងរយៈពេលវែង។
ការចុះពិនិត្យនេះក៏ជាផ្នែកមួយនៃយុទ្ធសាស្ត្ររបស់ ក្រសួងបរិស្ថាន ក្នុងការកែលម្អប្រព័ន្ធគ្រប់គ្រងសំណល់រឹងនៅតាមតំបន់ជនបទ និងទីប្រជុំជនទូទាំងប្រទេស ដើម្បីឆ្លើយតបទៅនឹងការកើនឡើងនៃសំណល់ និងការការពារបរិស្ថានឲ្យមានប្រសិទ្ធភាព។
តាមការវាយតម្លៃដំបូង ទីតាំងដែលបានជ្រើសរើសមានសក្តានុពលសមស្របសម្រាប់ការអភិវឌ្ឍជាទីលានគ្រប់គ្រងសំណល់ ដោយគោរពតាមស្តង់ដារបច្ចេកទេស និងបរិស្ថាន។ ទន្ទឹមនឹងនេះ ក្រុមការងារក៏នឹងបន្តសិក្សាលម្អិតបន្ថែម ដើម្បីធានាថាគម្រោងអនុវត្តបានដោយគ្មានផលប៉ះពាល់អវិជ្ជមានដល់សហគមន៍ជុំវិញ។
សកម្មភាពនេះបង្ហាញពីការយកចិត្តទុកដាក់យ៉ាងខ្ពស់របស់អាជ្ញាធរ និង ក្រសួងបរិស្ថាន ក្នុងការពង្រឹងគុណភាពបរិស្ថាន និងលើកកម្ពស់ជីវភាពរស់នៅរបស់ប្រជាពលរដ្ឋ ឆ្ពោះទៅរកការអភិវឌ្ឍប្រកបដោយចីរភាព និងសមតុល្យរវាងសេដ្ឋកិច្ច សង្គម និងបរិស្ថាន៕ ដោយ កៅ វង
