ខេត្តកំពង់ធំ ៖ ក្នុងឱកាសគម្រប់ខួប ២ឆ្នាំ នៃការកាន់តំណែងជាអភិបាលនៃគណៈអភិបាលខេត្តកំពង់ធំ ឯកឧត្តម នួន ផារ័ត្ន ទទួលបានការសរសើរ និងការគាំទ្រយ៉ាងខ្លាំងពីសំណាក់ប្រជាពលរដ្ឋមូលដ្ឋាន ចំពោះស្នាដៃស្ដារ និងអភិវឌ្ឍន៍ខេត្តយ៉ាងគំហុក។
យោងតាមការចុះអង្កេត និងមតិផ្ទាល់ពីប្រជាពលរដ្ឋជាច្រើននៅក្នុងខេត្តកំពង់ធំ បានបង្ហាញពីបំណងប្រាថ្នាចង់ឱ្យឯកឧត្តមអភិបាលខេត្ត បន្តដឹកនាំ និងអភិវឌ្ឍន៍ខេត្តនេះក្នុងអាណត្តិបន្តបន្ទាប់ទៀត។ ប្រជាពលរដ្ឋបានលើកឡើងថា ចាប់តាំងពីលោកបានមកកាន់តំណែងកាលពីថ្ងៃទី២៤ ខែមិថុនា រហូតមកដល់បច្ចុប្បន្ន វឌ្ឍនភាពលើគ្រប់វិស័យត្រូវបានមើលឃើញយ៉ាងច្បាស់ក្រឡែត។
ក្នុងរយៈពេល ២ឆ្នាំកន្លងមកនេះ ស្នាដៃលេចធ្លោរបស់ឯកឧត្តម នួន ផារ័ត្ន រួមមាន៖
ការអភិវឌ្ឍហេដ្ឋារចនាសម្ព័ន្ធ៖ ការស្ថាបនា និងកែលម្អផ្លូវថ្នល់ ប្រព័ន្ធទឹកស្អាត និងភ្លើងបំភ្លឺសាធារណៈ ដែលធ្វើឱ្យមុខមាត់ខេត្តមានការប្រែប្រួលជាវិជ្ជមាន និងបង្កលក្ខណៈងាយស្រួលដល់ការធ្វើដំណើរ និងការដឹកជញ្ជូន។
ការដោះស្រាយវិវាទ និងបញ្ហាប្រឈម៖ យន្តការដោះស្រាយបញ្ហាដីធ្លី និងកង្វល់នានារបស់ប្រជាពលរដ្ឋនៅមូលដ្ឋានត្រូវបានធ្វើឡើងដោយតម្លាភាព និងមានប្រសិទ្ធភាពខ្ពស់ ដែលបង្កើតបាននូវជំនឿចិត្តយ៉ាងខ្លាំងពីសាធារណជន។
ការលើកកម្ពស់ជីវភាពរស់នៅ ការជំរុញវិស័យកសិកម្ម ពាណិជ្ជកម្មមូលដ្ឋាន និងការទាក់ទាញការវិនិយោគ ដែលបានបង្កើតឱកាសការងារ និងបង្កើនចំណូលផ្ទាល់ខ្លួនរបស់ប្រជាពលរដ្ឋ។
តំណាងប្រជាពលរដ្ឋម្នាក់បានលើកឡើងក្នុងលក្ខខណ្ឌមិនបញ្ចេញឈ្មោះថា៖ យើងខ្ញុំមិនចង់ឱ្យ ឯកឧត្តម អភិបាលផ្លាស់ប្តូរទៅណាឡើយ។ លោកជាថ្នាក់ដឹកនាំដែលចុះជាប់ជាមួយប្រជាជន ដឹងសុខទុក្ខ និងបានកែប្រែខេត្តកំពង់ធំឱ្យមានការរីកចម្រើនយ៉ាងពិតប្រាកដ។
ការបង្ហាញមនោសញ្ចេតនា និងការគាំទ្រពីសំណាក់ប្រជាពលរដ្ឋនៅថ្ងៃទី២៤ ខែមិថុនា ឆ្នាំ២០២៦ នេះ ឆ្លុះបញ្ចាំងឱ្យឃើញពីជោគជ័យនៃនយោបាយរដ្ឋបាលថ្នាក់ក្រោមជាតិ ក្នុងការបម្រើផលប្រយោជន៍សាធារណៈ និងការអភិវឌ្ឍប្រកបដោយចិរភាពនៅក្នុងតំបន់សេដ្ឋកិច្ចកណ្តាលនៃប្រទេសកម្ពុជា៕ដោយ សឿង សុទ្ធ
