(ភ្នំពេញ)៖ ស្របពេលដែលសហគ្រាសខ្នាតមីក្រូ តូច និងមធ្យម (MSMEs) កាន់តែមានសន្ទុះជាងមុន លោក ហែម វណ្ណឌី រដ្ឋមន្ត្រីក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ បានអំពាវនាវដល់គ្រប់ភាគីព័ន្ធទាំងផ្នែករដ្ឋ និងឯកជន ដៃគូអភិវឌ្ឍន៍ អង្គការជាតិ និងអន្តរជាតិ ព្រមទាំងធនាគារ រួមគ្នាជួយជ្រោមជ្រែង និងគាំទ្រដល់ MSMEsឱ្យអស់ពីកម្លាំងកាយចិត្ត និងលទ្ធភាព និងរួមគ្នាកសាងបរិយាកាសអាជីវកម្មឱ្យបានល្អ ពង្រីងគុណភាពផលិតផលឱ្យបានកាន់តែប្រសើរ និងក្តាប់ឱកាសចូលទីផ្សារជាតិ និងអន្តរជាតិឱ្យបានជាប់។
ការអំពាវនាវនេះ ធ្វើឡើងក្នុងឱកាសដែរ រាជរដ្ឋាភិបាលកម្ពុជាបានប្រារព្ធទិវាជាតិសហគ្រាសធុនមីក្រូ តូច និងមធ្យម លើកទី៣ ក្រោមប្រធានបទ «សាងស្ពានសម្រាប់សហគ្រាសធុនមីក្រូ តូច និងមធ្យមឆ្ពោះទៅកាន់ទីផ្សារ» នាថ្ងៃទី២៧ ខែមិថុនា ឆ្នាំ២០២៦។
លោក ហែម វណ្ណឌី បានគូសបញ្ជាក់ថា ការជួយគាំទ្រ MSMEs ឱ្យចូលទៅកាន់ទីផ្សារ មិនមែនសំដៅត្រឹមការបង្កើនផលិតកម្មប៉ុណ្ណោះទេ ប៉ុន្តែត្រូវពង្រឹងគុណភាព ផលិតភាព និងអនុលោមភាព ដោយចាប់យកបច្ចេកវិទ្យា និងនវានុវត្តន៍ ដើម្បីកសាងទំនុកចិត្តពីអ្នកប្រើប្រាស់ និងដៃគូអាជីវកម្ម។
លោកបន្តថា រាជរដ្ឋាភិបាលកម្ពុជាបានដាក់ចេញនូវយន្តការគាំទ្រជាច្រើន ដើម្បីពង្រឹងប្រព័ន្ធអេកូឡូស៊ីសហគ្រាសធុនមីក្រូ តូច និងមធ្យម រួមមានការពង្រីកលទ្ធភាពទទួលបានហិរញ្ញប្បទាន ការអភិវឌ្ឍសហគ្រិនភាព ការបណ្តុះបណ្តាលជំនាញ កម្មវិធីបរិវត្តកម្មឌីជីថល និងសេវាគាំទ្រការអភិវឌ្ឍអាជីវកម្មជាដើម។
លោកសង្កត់ធ្ងន់ថា «ឆ្លើយតបទៅនឹងស្ថានភាពសេដ្ឋកិច្ចសកល និងចលនាស្នេហាជាតិរបស់ប្រជាជនកម្ពុជា រាជរដ្ឋាភិបាលបានគិតគូដាក់ចេញជាវិធានការមុតស្រួច ដើម្បីលើកកម្ពស់ និងជំរុញសហគ្រាសសិប្បកម្មក្នុងស្រុក ឲ្យទទួលបាននូវស្តង់ដាគុណភាព និងការច្នៃវត្ថុធាតុដើមក្នុងស្រុកឲ្យអស់លទ្ធភាព ដើម្បីកាត់បន្ថយថ្លៃដើមផលិតផល។ ទទឹមនឹងការផលិតក្នុងស្រុកត្រូវបានលើកកម្ពស់ រាជរដ្ឋាភិបាលបានធ្វើការចរចារពាណិជ្ជកម្មដើម្បីបើកទ្វារទទួលអ្នកវិនិយោគក្រៅស្រុក និងរកទីផ្សារអន្តរជាតិ តាមរយៈកិច្ចព្រមទាំងពាណិជ្ជកម្មនានា ដូចជាកិច្ចព្រមព្រៀងពាណិជ្ជកម្មកម្ពុជា-ចិន កម្ពុជា-កូរ៉េ កម្ពុជា-UAE និងកិច្ចព្រមព្រៀងពាណិជកម្មRCEP ជាដើម។ ក្នុងបរិបទនេះ ក្រសួងឧស្សាហកម្ម វិទ្យាសាស្រ្ត បច្ចេកវិទ្យា និងនវានុវត្តន៍ នឹងបន្តធ្វើកិច្ចសហការជាមួយក្រសួងស្ថាប័ននិងវិស័យឯកជន ដៃគូរអភិវឌ្ឍ អង្គការជាតិ និងអន្តរជាតិ ធ្វើយ៉ាងណាជំរុញ MSMEs ឱ្យកាន់តែរីកចម្រើននិងចូលរួមចំណែកកាន់តែច្រើនថែមទៀតក្នុងប្រព័ន្ធផ្លូវការនៃសេដ្ឋកិច្ចជាតិ»។
បន្ថែមពីនេះ លោកបានអំពាវនាវដល់បណ្តាធនាគាររដ្ឋ និងឯកជន បន្តគាំទ្រ និងសម្របសម្រួលនិតិវិធីផ្តល់កម្ចីដល់MSMEs ក្នុងអត្រាការប្រាក់កាន់តែប្រសើរ ដើម្បីឱ្យពួកគេមានលទ្ធភាពខ្ពស់ជាងមុន ក្នុងការពង្រឹង និងពង្រីកផលិតកម្មរបស់ខ្លួន។
គិតត្រឹមដំណាច់ឆ្នាំ២០២៥ ធនាគារសហគ្រាសធុនតូច និងមធ្យម (SME Bank) បានផ្តល់ឥណទានគោលនយោបាយជិត៥០០ លានដុល្លារអាមេរិក ដល់សហគ្រាសជាង ៣.៤០០ មូលដ្ឋាន, សាជីវកម្មធានាឥណទានកម្ពុជា (CGCC) បានគាំទ្រអាជីវកម្មជាង ៣.១០០ មូលដ្ឋាន តាមរយៈយន្តការធានាឥណទាន ទន្ទឹមនោះ សហគ្រិនខ្មែរ (KE) បានគាំទ្រគម្រោងសហគ្រិនភាព ៥១៦ គម្រោង និងបានកៀរគរហិរញ្ញប្បទាន និងវិនិយោគប្រមាណ ៤៧ លានដុល្លារអាមេរិក។
យោងតាមជំរឿនសេដ្ឋកិច្ចកម្ពុជា ឆ្នាំ២០២២ កម្ពុជាមានអង្គភាពសេដ្ឋកិច្ចចំនួន ៧៥៣.៦៧០ មូលដ្ឋាន ក្នុងនោះសហគ្រាសធុនតូច និងមធ្យមមានចំនួនជាង ៦០.៥០០ មូលដ្ឋាន។ វិស័យនេះផ្តល់ការងារដល់ប្រជាពលរដ្ឋជិត ៣លាននាក់ រួមចំណែកប្រមាណ ៦៣% នៃផលិតផលក្នុងស្រុកសរុប និងផ្តល់ការងារជាង ៧០% នៃការងារក្រៅវិស័យកសិកម្ម ដែលបង្ហាញពីតួនាទីដ៏សំខាន់របស់ MSMEs ក្នុងសេដ្ឋកិច្ចជាតិ៕
