(ម៉ិកស៉ីកូ)៖ ក្រសួងហិរញ្ញវត្ថុអាមេរិក កាលពីថ្ងៃអង្គារ ទី៣០ ខែមិថុនា ឆ្នាំ២០២៦ បានប្រកាសទណ្ឌកម្មថ្មីលើជនជាតិម៉ិកស៉ិក ២នាក់ និងក្រុមហ៊ុនចំនួន ៩ ដោយចោទប្រកាន់ថាមានជាប់ពាក់ព័ន្ធនឹងក្រុមជួញដូរប្រេងឥន្ធនៈ ដែលដឹកជញ្ជូនប្រេងឥន្ធនៈពីអាមេរិកចូលទៅម៉ិកស៉ិក ដោយមិនបានបង់ពន្ធខ្ពស់លើការនាំចូល។ នេះបើយោងតាមការចេញផ្សាយដោយទីភ្នាក់ងារសារព័ត៌មាន Reuters។
ក្រសួងហិរញ្ញវត្ថុអាមេរិក បានឱ្យដឹងថា ក្រុមជួញដូរប្រេងនេះ មានទំនាក់ទំនងជាមួយក្រុមឧក្រិដ្ឋជនគ្រឿងញៀន CJNG របស់ម៉ិកស៉ិក និងជាផ្នែកមួយនៃសហគ្រាសខុសច្បាប់ ដែលរកចំណូលបានរាប់រយលានដុល្លាររៀងរាល់ឆ្នាំ ឱ្យក្រុមឧក្រិដ្ឋជនគ្រឿងញៀន។ តាមរដ្ឋាភិបាលអាមេរិក ប្រេងរត់ពន្ធ និងប្រេងឆៅដែលលួចបាន បានក្លាយជាប្រភពចំណូលធំទីពីរ សម្រាប់ក្រុមឧក្រិដ្ឋជនគ្រឿងញៀនម៉ិកស៉ិក បន្ទាប់ពីគ្រឿងញៀន។
គួរបញ្ជាក់ថា ម៉ិកស៉ិក បានអនុវត្តការយកពន្ធដែលគេស្គាល់ថា IEPS លើទំនិញច្រើនប្រភេទ រួមទាំងប្រេងម៉ាស៊ូត និងប្រេងសាំងនាំចូល។ ក្រសួងហិរញ្ញវត្ថុអាមេរិក ចោទប្រកាន់ថា ក្រុមឧក្រិដ្ឋជនគ្រឿងញៀនម៉ិកស៉ិក និងបណ្តាញពួកគេអាចគេចវេសពន្ធ តាមរយៈការបន្លំឯកសារគយ និងការសូកប៉ាន់មន្ត្រីរដ្ឋាភិបាល។ ជុំវិញការដាក់ទណ្ឌកម្មនេះ ម៉ិកស៉ិកនៅមិនទាន់មានការអត្ថាធិប្បាយទេ៕
