(កំពង់ធំ)៖ លោកអភិបាលស្រុកស្ទោងណែនាំដល់បេក្ខជនត្រៀមប្រឡង សញ្ញាបត្រមធ្យមសិក្សាទុតិយភូមិត្រូវមានភាពឆ្លៀសវៃចេះបត់បែនតាមស្ថានភាពកាលៈទេសៈ។
លោក សាយ គឹមឡម បានធ្វើការណែនាំនេះក្នុងឱកាសដែលលោកបានជួបសំណេះសំណាលសួរសុខទុក្ខ និងលើកទឹកចិត្តបេក្ខជនត្រៀមប្រឡងបាក់ឌុប និងអាណាព្យាបាល មកពីភូមិកំពង់ចិន កាលពីព្រឹកថ្ងៃទី០៧ ខែសីហា ឆ្នាំ ២០២៦។
លោកបានសង្កត់ធ្ងន់ថា មិនមែនសម្រាប់តែក្នុងស្ថានភាពប្រឡងឬស្ថានភាពប្រកួតប្រជែងណាមួយទេគឺទាំងស្ថានភាពរស់នៅប្រចាំថ្ងៃយើងត្រូវចេះសម្របខ្លួនទៅតាមស្ថានភាពជាក់ស្តែង មានភាពស្ទាត់ជំនាញក្នុងការដោះស្រាយបញ្ហាប្រឈមភ្លាមៗពេលប្រឡង និងក្នុងការរស់នៅ ជាពិសេសសម្របសម្រួលទៅតាមបរិបទសង្គមទូទៅ។
ទន្ទឹមនឹងនេះ បេក្ខជនគ្រប់រូបត្រូវ ត្រៀមលក្ខណៈឱ្យបានគ្រប់គ្រាន់ ថែរក្សាសុខភាពកាយ ថែរក្សាផ្លូវចិត្តឱ្យមានស្មារតីរឹងប៉ឹង ព្រមទាំងខិតខំប្រឹងប្រែងប្រមូលផ្តុំប្រាជ្ញាញាណដើម្បីទទួលបានលទ្ធផលល្អ។
លើសពីនេះក្នុងនាមជាអ្នកសិក្សារៀនសូត្រនិងជាយុវជនត្រូវកំណត់គោលដៅឱ្យបានច្បាស់លាស់ ត្រូវមានទស្សនវិស័យវែងឆ្ងាយបន្ទាប់ពីបញ្ចប់ការប្រឡង ដោយជ្រើសរើសជំនាញសិក្សានៅមហាវិទ្យាល័យ ឬសាលាវគ្គបណ្តុះបណ្តាលវិជ្ជាជីវៈឱ្យស្របតាមចំណង់ចំណូលចិត្ត និងតម្រូវការទីផ្សារពលកម្ម។
លើសពីនេះទៀត ដើម្បីជាការតបស្នងសងគុណដល់ឪពុកម្ដាយក្រុមគ្រួសារលោកគ្រូអ្នកគ្រូ និងស្រុកកំណើត បន្ទាប់ពីទទួលបានចំណេះដឹង និងជំនាញច្បាស់លាស់ហើយ ត្រូវយកសមត្ថភាពទាំងនោះមកចូលរួមចំណែកកសាង និងអភិវឌ្ឍមូលដ្ឋានស្រុកស្ទោងឱ្យកាន់តែរីកចម្រើន។
ជាមួយនេះដែរលោកបានថ្លែងអំណរគុណយ៉ាងជ្រាលជ្រៅបំផុតដល់លោក សោម សារឿន និងភរិយា ដែលបាននិងតែងតែចូលរួមសហការជាមួយអាជ្ញាធរសុខស្ទោង ជាពិសេសបានឧបត្ថម្ភនៅទឹកប្រាក់ និងសម្ភារសម្រាប់លើកទឹកចិត្តក្មួយៗជាបេក្ខជន មកពីភូមិកំពង់ចិន ឃុំកំពង់ចិនត្បូង នៅក្នុងឱកាសនេះ។
ឆ្លៀតឱកាសនេះលោក វ៉ាត សុណា នាយប៉ុស្តិ៍នគរបាលរដ្ឋបាលកំពង់ចិនត្បូង បានឆ្លៀតបញ្ជ្រាបអំពីគោលការណ៍ភូមិឃុំមានសុវត្ថិភាពនិងគ្រឿងញៀនដល់បេក្ខជនបានជ្រាបនិងជាសវៀងឱ្យបានដាច់ខាត។
សូមបញ្ជាក់ថា បេក្ខជនដែល បានចូលរួមនៅក្នុងឱកាសនេះមានចំនួន ២៣នាក់ ដែលក្នុងនោ១នាក់ទទួលបានការឧបត្ថម្ភនៅថវិកាចំនួន៥ម៉ឺនរៀល និងសារុងមួយ។ អត្ថបទ រដ្ឋបាលស្រុកស្ទោង
