(បាត់ដំបង)៖ នៅព្រឹកថ្ងៃសុក្រ ៤រោច ខែអស្សុជ ឆ្នាំមមី អដ្ឋស័ក ព.ស២៥៧០ ត្រូវនឹងថ្ងៃទី៣០ ខែតុលា ឆ្នាំ២០២៦នេះ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីកម្ពុជា អញ្ជើញចែកពូជស្រូវ និងស្បៀងជូនប្រជាពលរដ្ឋរងផលប៉ះពាល់ដោយសារជំនន់ទឹកភ្លៀងនៅក្នុងខេត្តបាត់ដំបង។
ទឹកភ្លៀងដែលធ្លាក់មកយ៉ាងខ្លាំងក្លាកាលពីខែកញ្ញាកន្លងទៅ បានបង្កការលិចលង់យ៉ាងខ្លាំងនៅខេត្តពាយព្យប្រទេសរួមមានបាត់ដំបង ប៉ៃលិន និងបន្ទាយមានជ័យ។ ជំនន់ទឹកភ្លៀង បានបង្កផលប៉ះពាល់យ៉ាងធ្ងន់ធ្ងរដល់ការរស់នៅរបស់ប្រជាពលរដ្ឋ ផលដំណាំ ជាពិសេសដំណាំស្រូវ ដែលជាដំណាំប្រចាំជីវិតរបស់ប្រជាពលរដ្ឋខ្មែរ។
ផលប៉ះពាល់ ការខូចខាតផលដំណាំទាំងនេះ នាំមកនូវការខាតបង់ និងស្តាយស្រណោះយ៉ាងខ្លាំងសម្រាប់ប្រជាកសិករ។ ទុក្ខលំបាក ការខាតបង់ ការស្តាយស្រណោះរបស់ប្រជាកសិករ ក៏ជាការខាតបង់ និងជាការសោកស្តាយរបស់ថ្នាក់ដឹកនាំរាជរដ្ឋាភិបាលដូចគ្នាដែរ។
រាល់ការលំបាក និងការរងគ្រោះរបស់ប្រជាកសិករ មិនត្រូវបានទុកឱ្យរំលងផុតដោយគ្មានការគិតគូរដោះស្រាយពីសំណាក់រាជរដ្ឋាភិបាលនោះឡើយ។ មរតកស្មារតីនៃការគិតគូរយកចិត្តទុកដាក់ដោះស្រាយលើទុក្ខលំបាករបស់ប្រជាកសិករតាំងពីសម្តេចតេជោ ហ៊ុន សែន រហូតមកដល់សម្តេចមហាបវរធិបតី ហ៊ុន ម៉ាណែត។ ស្មារតីនៃការគិតគូរលើទុក្ខលំបាករបស់ប្រជាកសិករនេះហើយ ដែលជំរុញឱ្យមានព្រឹត្តិការណ៍នៃជំនួបដ៏ធំរវាងសម្តេចនាយករដ្ឋមន្ត្រី និងប្រជាកសិករនាព្រឹកថ្ងៃនេះ ដើម្បីចែកពូជស្រូវ ចែកស្បៀង និងពូជបន្លែនានា។
របាយការណ៍របស់លោក សុខ លូ អភិបាលខេត្តបាត់ដំបង បានឱ្យដឹងថា ប្រជាពលរដ្ឋចំនួន ១៥.១៥៥គ្រួសារ ទទួលបានពូជស្រូវ និងពលរដ្ឋ ៣៤.៧៨១គ្រួសារ ទទួលបាន កញ្ចប់ស្បៀង និងពូជបន្លែ។
យោងតាមរបាយការណ៍បានបង្ហាញថា គ្រោះជំនន់ទឹកភ្លៀង ធ្វើឱ្យខេត្តបាត់ដំបង រងគ្រោះប៉ះពាល់ ១៤ក្រុង ស្រុក ស្មើនឹង ៨៨ឃុំ សង្កាត់។ បណ្ដាលឱ្យផលប៉ះពាល់ដំណាំស្រូវសរុប ១២៣.០៧២ហិកតា ក្នុងនោះមានស្រូវទុំ ១៥.៦៣៨ហិកតា, ខូចខាតដាំណាំស្រូវ ៧៤.៣៨៨ហិកតា, ដំណាំសាកវប្បកម្ម និងឧស្សាហកម្មផលសរុប ១៦.៣៧៤ហិកតា, ខូចខាត ៨.៦៨០ហិកតា។ គ្រួសារដែលរងផលប៉ះពាល់ សរុប ៥៨.១០៣គ្រួសារ ខូចខាត ៣៥.៧០៤គ្រួសារ។
ក្នុងនោះផ្ទៃដីដែលរំពឹងអាចស្តារឡើងវិញ ក្រោយទឹកស្រកមានចំនួន ៤៩.០០០ហិកតា។
ជំនន់ទឹកភ្លៀងក៏បណ្តាលឱ្យផ្ទះប្រជាពលរដ្ឋទាំង ១៤ក្រុង ស្រុក ស្មើនឹង ៨៨ឃុំ សង្កាត់ រងផលប៉ះពាល់សរុបចំនួន ៤៥.០២៧ខ្នងផ្ទះ ស្មើនឹង ៥២.៩៨៤គ្រួសារ មនុស្សរាយ ១៨៤.៧១៧នាក់ សី ៩៨.៤១១នាក់ ជម្លៀសប្រជាពលរដ្ឋមកនៅទីទួលមានសុវត្ថិភាព និងជាមួយសាច់ញាតិសរុបចំនួន ៣.៧១១គ្រួសារ ស្មើនឹង ១៤.៤៧០នាក់ ស្រី ៧.៣៧៦នាក់ របួស៣នាក់ និងស្លាប់ ៨នាក់ ក្នុងនោះលង់ទឹកស្លាប់ ៧នាក់ និងឆ្លងចរន្តអគ្គិសនីស្លាប់ ១នាក់។
ជំនន់ទឹកភ្លៀងនេះ បង្កផលប៉ះពាល់សាលាឃុំ ៤កន្លែង, ប៉ុស្តិ៍នគរបាលរដ្ឋបាល ១កន្លែង, មណ្ឌលសុខភាព ៥កន្លែងសាលារៀន ៦៨សាលា និងប៉ះពាល់វត្ត ២៩វត្ត។ ជំនន់ទឹកភ្លៀងនេះ ក៏បង្កផលប៉ះពាល់ដល់ហេដ្ឋារចនាសម្ព័ន្ធដូចជាផ្លូវដែក
ការប៉ះពាល់ និងខូចខាតផ្លូវជាច្រើនខ្សែ។ ផ្លូវដែលរងការលិចដោយជំនន់ទឹកភ្លៀងមានចំនួន ៣០ខ្សែ ប្រវែងសរុប ២១៥,៣៨គីឡូម៉ែត្រ។ ផ្លូវដែលបានស្រុតមានចំនួន ២៥ខ្សែផ្លូវ ប្រវែងសរុប ១៧៥,៤៨គីឡូម៉ែត្រ។
យោងតាមរបាយការណ៍របស់គណៈកម្មាធិការជាតិគ្រប់គ្រងគ្រោះមហន្តរាយ បានឱ្យដឹងថា ទឹកជំនន់ក្នុងឆ្នាំ២០២៦នេះ បានប៉ះពាល់ដល់ខេត្តចំនួន១០ ក្រុង-ស្រុកចំនួន៥៦ និងឃុំ-សង្កាត់ ចំនួន៣១៥។ គ្រួសាររងផលប៉ះពាល់មានចំនួន ១០៩,៩៨៥គ្រួសារ ផ្ទះដែលរងផលប៉ះពាល់មានចំនួន ៨៨,៨១១ខ្នង និងគ្រួសារដែលបានជម្លៀសទៅកាន់ទីទួលមានសុវត្ថិភាពមានចំនួន ៩,០២៧គ្រួសារ។ចំពោះស្រូវដែលរងផលប៉ះពាល់មានចំនួន ២២៧.៩៦៥ហិកតា ក្នុងនោះផ្ទៃដីដែលខូចខាតមានចំនួន ១០៤.៣៤៤ហិកតា។
គណៈកម្មាធិការជាតិគ្រប់គ្រងគ្រោះមហន្តរាយ បានវាយតម្លៃក្នុងខេត្តគោលដៅចំនួន៧ រួមមាន ខេត្តបាត់ដំបង ពោធិ៍សាត់ បន្ទាយមានជ័យ សៀមរាប កំពង់ធំ ឧត្តរមានជ័យ និងតាកែវ ផ្ទៃដីស្រូវដែលអាចស្តារឡើងវិញបានមានចំនួន ៦១,៥៣៦ហិកតា ស្មើនឹង ២៥,៦២៦គ្រួសារ។
តាមការគណនាតម្រូវការពូជស្រូវជាមធ្យម ១០០គីឡូក្រាមក្នុងមួយគ្រួសារ នឹងត្រូវការពូជស្រូវសរុបប្រមាណ ២.៥៦៣តោន សម្រាប់គ្រួសារដែលត្រូវបានកំណត់ថាមានលទ្ធភាពស្តារការដាំដុះឡើងវិញ។ ការគាំទ្រពូជស្រូវនេះ មានគោលបំណងជួយកាត់បន្ថយបន្ទុកចំណាយដំបូងរបស់កសិករ និងផ្តល់ឱកាសឱ្យពួកគាត់ចាប់ផ្តើមដាំដុះឡើងវិញ៕
