ខេត្តបន្ទាយមានជ័យ៖ អភិបាលខេត្តបន្ទាយមានជ័យ ឯកឧត្តម អ៊ុំ រាត្រី បានណែនាំឲ្យអាជ្ញាធរក្រុង
ប៉ោយប៉ែត ដែលកំពុងប្រឈមការរាតត្បាតនៃជំងឺកូវីដ១៩ ត្រូវរឹតត្បិតការធ្វើដំណើរចេញចូល ដើម្បីលុបបំបាត់ខ្សែឆ្លងជំងឺកូវីដ១៩ នៅក្នុងសហគមន៍។
ការណែនាំបែបនេះរបស់ឯកឧត្តម អ៊ុំ រាត្រី បានធ្វើឡើងនៅក្នុងកិច្ចប្រជុំគណៈបញ្ជាការឯកភាពរដ្ឋបាលខេត្ត នៅថ្ងៃទី៥ ខែឧសភា ឆ្នាំ២០២១ លើរបៀបវារៈសំខាន់ៗរួមមាន៖ សេចក្ដីណែនាំ សេចក្ដីសម្រេច របស់រាជរដ្ឋាភិបាល និងសេចក្ដីជូនដំណឹងរបស់ក្រសួងសុខាភិបាល ដែលផ្ដោតសំខាន់លើការងារអនុវត្តទប់ស្កាត់ ការរីករាលដាលជំងឺកូវីដ១៩ សម្រាប់ប្រទេសកម្ពុជាបច្ចុប្បន្ននេះ កំពុងប្រឈមនូវការរីករាលដាលកូវីដ១៩ មិនទាន់ធូរស្បើយនៅឡើយ។
ឯកឧត្តម បានឱ្យដឹងថា សម្រាប់នៅខេត្តបន្ទាយមានជ័យ ចាប់ពីថ្ងៃទី២២ ខែមេសា ឆ្នាំ២០២១ មានករណីផ្ទុះជំងឺកូវីដ១៩ ក្នុងសហគមន៍ ភាគច្រើននៅក្រុងប៉ោយប៉ែតជាង៦០០នាក់ គិតត្រឹមថ្ងៃទី៤ ខែឧសភា ឆ្នាំ២០២១។
ឯកឧត្តម អ៊ុំ រាត្រី បានបញ្ជាក់ថា នៅពេល នេះគឺជាដំណាក់កាលត្រូវអនុវត្តកាតព្វកិច្ចពាក់ម៉ាស និងកាតព្វកិច្ចរក្សាគម្លាតសុវត្ថិភាព ក្នុងអំឡុងពេល នៃការឆ្លងរីករាលដាលជំងឺកូវីដ១៩ក្នុងសហគមន៍។
ទន្ទឹមនឹងនេះដែរ ឯកឧត្តម អ៊ុំ រាត្រី ក៏បានក្រើនរំលឹកដល់កងកម្លាំងប្រដាប់អាវុធគ្រប់ប្រភេទ ដែលកំពុងឈរជើងការពារតាមខ្សែបន្ទាត់ព្រំដែន ត្រូវធ្វើការរឹតបន្តឹង នូវវិធានការលុបបំបាត់ ការនាំមនុស្សចេញចូលឆ្លងកាត់ដោយខុសច្បាប់។ ដើម្បីធានារក្សាសន្តិសុខជាតិ សណ្ដាប់ធ្នាប់សាធារណៈ និងសុវត្ថិភាពសង្គម ក្រសួងមហាផ្ទៃបានដាក់ចេញនូវគោលការណ៍ និងវិធានការជាបន្តបន្ទាប់ក្នុងការបង្ការទប់ស្កាត់ និងបង្រ្កាបសកម្មភាព នាំមនុស្សឆ្លងកាត់ព្រំដែន ដោយខុសច្បាប់ និងការគ្រប់គ្រងជនបរទេសស្របតាមច្បាប់។
រដ្ឋបាលខេត្ត បានកត់សម្គាល់ឃើញថា ករណីនៃការនាំពលរដ្ឋកម្ពុជា និងជនបរទេសឆ្លងកាត់ព្រំដែនដោយខុសច្បាប់ នៅតែកើតមានជាបន្តបន្ទាប់ក្នុងនោះក៏មានករណីមួយចំនួនមានក្រុមមេក្លោង និងមេខ្យល់ក្នុងស្រុក ឃុបឃិត ជាមួយមេក្លោង មេខ្យល់ខាងក្រៅ ដើម្បីរត់ពន្ធមនុស្សឆ្លងកាត់ព្រំដែនដោយខុសច្បាប់ផងដែរ៕ By C.L.N
