(លីម៉ា)៖ តាមការចេញផ្សាយដោយទីភ្នាក់ងារសារព័ត៌មាន AFP នៅថ្ងៃព្រហស្បតិ៍ ទី៨ ខែធ្នូ ឆ្នាំ២០២២ បានអោយដឹងថា ប្រធានាធិបតីប៉េរូ លោក ប៉េត្រូ កាស្ទីយ៉ូ (Pedro Castillo) នៅថ្ងៃពុធសប្ដាហ៍នេះ ត្រូវបានសមាជិកសភានាំគ្នាបោះឆ្នោតបណ្ដេញចេញពីអំណាច និងចាប់ខ្លួន បន្ទាប់ពីលោកប៉ុនប៉ងរំលាយសភាជាតិ។
ការបោះឆ្នោតទម្លាក់លោក ប៉េត្រូ កាស្ទីយ៉ូ ចេញពីអំណាចធ្វើឡើង បន្ទាប់ពីប្រធានាធិបតីវ័យ ៥៣ ឆ្នាំរូបនេះ បានប្រកាសនៅក្នុងសុន្ទរកថាមួយតាមកញ្ចក់ទូរទស្សន៍ថាលោក បាន និងកំពុងរំលាយ សភាគ្រប់គ្រងដោយគណបក្សប្រឆាំង និងដាក់ចេញបម្រាមគោចរ។
ការប្រកាសនេះបានទទួលរងការរិះគន់យ៉ាងខ្លាំង ហើយសមាជិកសភា បានកោះប្រជុំបន្ទាន់ ដើម្បី ជជែកដេញដោលលើការទម្លាក់លោក កាស្ទីយ៉ូ ពីអំណាច និងបានអនុម័តលើសេចក្ដីសម្រេចជា មួយការសំឡេងគាំទ្រ ១០១សំឡេង ក្នុងចំណោមសមាជិកសរុប ១៣០រូប។ សមាជិកសភាមកពីគណបក្សប្រឆាំងបានអះអាងថាលោក កាស្ទីយ៉ូ ត្រូវបានទម្លាក់ចេញពីអំណាច ដោយសារអសមត្ថភាព ក្នុងការដឹកនាំប្រទេស និងស្របទៅតាមរដ្ឋធម្មនុញ្ញជាតិដែលអនុញ្ញាតឱ្យ ដំណើរការនីតិវិធីចោទប្រកាន់ទម្លាក់ប្រធានាធិបតីពីអំណាច ៕
