សម្ដេចពិជ័យសេនា ទៀ បាញ់ អនុញ្ញាតឱ្យសាកលវិទ្យាធិការ សាកលវិទ្យាល័យការពារជាតិចិន ចូលជួបសម្ដែងការគួរសម និងពិភាក្សាការងារ

 (ភ្នំពេញ)៖ សម្ដេចពិជ័យសេនា ទៀ បាញ់ ឧបនាយករដ្ឋមន្រ្ដី រដ្ឋមន្រ្ដីក្រសួងការពារជាតិ នៅ រសៀលថ្ងៃទី១៣ ខែកក្កដា ឆ្នាំ២០២៣ម្សិលមិញនេះ បានអនុញ្ញាតឱ្យលោកឧត្តមសេនីយ៍ឯក ស៊ាវ ធានលៀង (Xiao Tianliang) សាកលវិទ្យាធិការ សាកលវិទ្យាល័យការពារជាតិ នៃកងទ័ពរំដោះ ប្រជាជនចិន ចូលជួបសម្ដែងការគួរសម និងពិភាក្សាការងារ។

គណៈប្រតិភូសាកលវិទ្យាល័យការពារជាតិ នៃកងទ័ពរំដោះប្រជាជនចិន បានធ្វើដំណើរទស្សនកិច្ច សិក្សាដើម្បីដកពិសោធន៍ការងារនៅកម្ពុជា ចាប់ពីថ្ងៃទី១២-១៥ ខែកក្កដា ឆ្នាំ២០២៣។

ជំនួបនេះបានធ្វើឡើងនៅទីស្ដីការក្រសួងការពារជាតិ ដោយមានការអញ្ជើញចូលរួមពីថ្នាក់ដឹកនាំ ក្រសួងការពារជាតិ និងថ្នាក់ដឹកនាំសាកលវិទ្យាល័យការពារជាតិ នៃសាធារណរដ្ឋប្រជាមានិតចិន ជាច្រើននាក់។ ឆ្នាំ២០២៣នេះ គឺជាឆ្នាំខួប៦៥ នៃការបង្កើតទំនាក់ទំនងការទូតចិន-កម្ពុជា ហើយ ក៏ជាឆ្នាំមិត្តភាព រវាងចិន និងកម្ពុជាផងដែរ៕