កូរ៉េខាងជើង ៖ មេដឹកនាំកំពូលរបស់កូរ៉េខាងជើងលោក គីម ជុងអ៊ុន បានបង្ហាញមុខសាធារណៈជាលើកដំបូង បន្ទាប់ពីបាត់មុខក្នុងឆាកនយោបាយអស់រយៈពេលប្រមាណ ២០ថ្ងៃ និងហ៊ុំព័ទ្ធទៅដោយពាក្យចចាមអារ៉ាមថាលោកបានស្លាប់។
នេះបើតាមទីភ្នាក់ងារសារព័ត៌មានរដ្ឋកូរ៉េខាងជើង KCNA បានរាយការណ៍នៅថ្ងៃសៅរ៍ ទី២ ខែឧសភា ឆ្នាំ២០២០។
ទីភ្នាក់ងារព័ត៌មាននិយមកណ្តាលរបស់កូរ៉េ បានសរសេរថា លោក គីម ជុងអ៊ុន បានចូលរួមពិធីកាត់ខ្សែបូសម្ពោធរោងចក្រផលិតជីមួយកន្លែងនៅភាគខាងជើងនៃរដ្ឋធានីព្យុងយ៉ាង កាលពីថ្ងៃសុក្រហើយប្រជាពលរដ្ឋដែលចូលរួមក្នុងកម្មវិធីនោះបានទះដៃអបអរសាទរយ៉ាងខ្លាំង ចំពោះការបង្ហាញខ្លួនជាសាធារណៈរបស់លោក គីម ដែលនឹងជម្រះអស់មន្ទិលសង្ស័យពីសាធារណជនជាតិនិងអន្តរជាតិ៕
