(ប៉ារីស)៖ ប្រធានាធិបតីបារាំង លោក Emmanuel Macron បាននិយាយថា លោកបានគំរាមចិនថានឹងដាក់ពន្ធគយ ប្រសិនបើទីក្រុងប៉េកាំង បរាជ័យក្នុងការចាត់វិធានការ ដើម្បីកាត់បន្ថយអតិរេកពាណិជ្ជកម្មដ៏ធំរបស់ខ្លួន ជាមួយសហភាពអឺរ៉ុប (EU)។ នេះបើយោងតាមការចេញផ្សាយដោយទីភ្នាក់ងារសារព័ត៌មាន AFP នៅថ្ងៃចន្ទ ទី៨ ខែធ្នូ ឆ្នាំ ២០២៥។
លោក Macron ប្រាប់កាសែត Les Echos ក្រោយត្រឡប់ពីដំណើរទស្សនកិច្ចផ្លូវរដ្ឋនៅចិន យ៉ាងដូច្នេះថា «ខ្ញុំបានប្រាប់ពួកគេ (ចិន) ថាប្រសិនបើពួកគេគ្មានប្រតិកម្មទេ យើង ជនជាតិអឺរ៉ុប នឹងត្រូវបង្ខំឱ្យចាត់វិធានការខ្លាំងក្លា ក្នុងប៉ុន្មានខែខាងមុខ»។ លោក Macron បញ្ជាក់ថា «វិធានការ គឺអាចយកលំនាំតាមសហរដ្ឋអាមេរិក ឧទាហរណ៍ ដូចជាដាក់ពន្ធលើផលិតផលចិន»។
តាមកាសែត Les Echos អតិរេកពាណិជ្ជកម្មរវាង EU ជាមួយចិនដែលជាដៃគូសេដ្ឋកិច្ចធំលំដាប់ទី ២របស់ខ្លួនបន្ទាប់ពីអាមេរិក គឺមានចំនួន ៣៥០ពាន់លានដុល្លារ ក្នុងឆ្នាំ ២០២៤។ សមាជិកប្លុកទាំង ២៧ប្រទេស មិនអាចកំណត់គោលនយោបាយពាណិជ្ជកម្ម រួមទាំងពន្ធគយជាលក្ខណៈឯកតោបានទេ ទាល់តែមានការសម្រេចជារួមពីគណៈកម្មការសហភាពអឺរ៉ុប៕
