(តៃប៉ិ)៖ នាថ្ងៃព្រហស្បតិ៍នេះ ក្រសួងការពារជាតិតៃវ៉ាន់ បាននិយាយថា រដ្ឋាភិបាលសហរដ្ឋអាមេរិក កំពុងដំណើរការគម្រោងលក់សព្វាវុធមកឱ្យដែនកោះនេះ មានតម្លៃ១១.១ពាន់លានដុល្លារ ដែលជាទំហំធំបំផុតមិនធ្លាប់មាន។ នេះបើតាមការចេញផ្សាយដោយ ទីភ្នាក់ងារព័ត៌មាន Reuters នាថ្ងៃព្រហស្បតិ៍ ទី១៨ ខែធ្នូ ឆ្នាំ២០២៥។
កញ្ចប់លក់សព្វាវុធឱ្យតៃវ៉ាន់ខាងលើនេះ គឺជាកញ្ចប់ទី២ ក្រោមរដ្ឋបាលបច្ចុប្បន្នរបស់ប្រធានាធិបតីអាមេរិក លោក ដូណាល់ ត្រាំ។ ក្រសួងការពារជាតិតៃវ៉ាន់ បាននិយាយក្នុងសេចក្តីប្រកាសថា ដំណើរការនៃការលក់នោះ បានឈានដល់ដំណាក់កាលជូនដំណឹងទៅកាន់សភាអាមេរិក។ បើតាមក្រសួងការពារជាតិតៃវ៉ាន់ ក្នុងកញ្ចប់សព្វាវុធនោះ មានសម្ភារសរុប៨មុខ រួមមានដូចជាប្រព័ន្ធបាញ់រ៉ុក្កែត HIMARS, កាំភ្លើងធំ, មីស៉ីលប្រឆាំងរថក្រោះ, ដ្រូន ព្រមទាំងគ្រឿងបន្លាស់សម្រាប់បរិក្ខារដទៃទៀត។
គួរបញ្ជាក់ថា គាំទ្រដោយសហរដ្ឋអាមេរិក តៃវ៉ាន់បាននិងកំពុងប្រឹងប្រែងប្រែក្លាយកងកម្លាំងប្រដាប់អាវុធរបស់ខ្លួន ដើម្បីឱ្យមានសមត្ថភាពទប់ទល់ជាមួយយោធារបស់ចិន ដែលមានទំហំធំជាងខ្លួនឆ្ងាយ។ ទីក្រុងវ៉ាស៉ីនតោន មិនមានទំនាក់ទំនងការទូតផ្លូវការជាមួយតៃវ៉ាន់ទេ ប៉ុន្តែជាខ្នងបង្អែកអន្តរជាតិ និងជាអ្នកផ្គត់ផ្គង់សព្វាវុធដ៏សំខាន់។ អាមេរិកមានកាតព្វកិច្ចផ្លូវច្បាប់ ត្រូវផ្តល់ឱ្យកោះតៃវ៉ាន់នូវមធ្យោបាយការពារខ្លួន ហើយការលក់អាវុធឱ្យតៃវ៉ាន់ គឺជាប្រភពចម្បងមួយនៃភាពរកាំរកូស ក្នុងទំនាក់ទំនងរវាងអាមេរិកនិងចិន៕
