ខេត្តក្រចេះ៖ ព្រឹត្តិការណ៍បុណ្យទន្លេលើកទី១០ ដែលជាព្រឹត្តិការណ៍ទេសចរណ៍ជាតិដ៏សំខាន់មួយរបស់ព្រះរាជាណាចក្រកម្ពុជា នឹងត្រូវរៀបចំប្រារព្ធឡើងនៅខេត្តក្រចេះ ចាប់ពីថ្ងៃទី២៧ ដល់ថ្ងៃទី២៩ ខែមីនា ឆ្នាំ២០២៦ ក្រោមប្រធានបទ «ទន្លេបៃតង បេតិកភណ្ឌវប្បធម៌ និងធម្មជាតិមហាសាល» ដោយរំពឹងថានឹងទាក់ទាញភ្ញៀវទេសចរជាតិ និងអន្តរជាតិមកចូលរួមយ៉ាងច្រើនកុះករ។
បុណ្យទន្លេ គឺជាព្រឹត្តិការណ៍ប្រចាំឆ្នាំដែលរៀបចំឡើងក្នុងគោលបំណងលើកកម្ពស់វិស័យទេសចរណ៍បែបនិរន្តរភាព ការអភិរក្សធនធានធម្មជាតិ និងការពង្រឹងតម្លៃបេតិកភណ្ឌវប្បធម៌តាមដងទន្លេមេគង្គ និងទន្លេផ្សេងៗនៅក្នុងប្រទេស។ ការរៀបចំនៅខេត្តក្រចេះ ឆ្នាំនេះ បង្ហាញពីសក្តានុពលធម្មជាតិដ៏សម្បូរបែប និងវប្បធម៌ដ៏សម្បូរបែបរបស់តំបន់ជាប់ទន្លេមេគង្គ ដែលល្បីល្បាញដោយសត្វផ្សោតអៀរវ៉ាឌី និងទេសភាពធម្មជាតិដ៏ស្រស់ស្អាត។
ក្នុងអំឡុងពេលបីថ្ងៃនៃព្រឹត្តិការណ៍ នឹងមានការរៀបចំកម្មវិធីសម្បូរបែប រួមមាន ពិធីបើកបុណ្យយ៉ាងអធិកអធម ការបង្ហាញសិល្បៈវប្បធម៌ ប្រពៃណី និងសម័យ ការប្រគំតន្ត្រី ការតាំងពិព័រណ៍ផលិតផលមូលដ្ឋាន និងផលិតផលសហគ្រាសខ្នាតតូច និងមធ្យម ការប្រកួតកីឡាទឹក ការប្រណាំងទូកកម្សាន្ត ព្រមទាំងសកម្មភាពកម្សាន្តផ្សេងៗទៀត ដែលបង្កើនភាពរស់រវើក និងទាក់ទាញសម្រាប់ភ្ញៀវទេសចរ។
ជាមួយគ្នានេះដែរ ការរៀបចំបុណ្យទន្លេក៏មានគោលបំណងជំរុញការយល់ដឹងអំពីការការពារបរិស្ថាន ការគ្រប់គ្រងធនធានទឹក និងការអភិវឌ្ឍន៍បៃតង ដើម្បីធានាថាទន្លេ និងប្រព័ន្ធអេកូឡូស៊ីត្រូវបានរក្សាទុកសម្រាប់ជំនាន់ក្រោយ។
អាជ្ញាធរខេត្តក្រចេះ និងក្រសួងពាក់ព័ន្ធ បានរៀបចំការត្រៀមខ្លួនយ៉ាងម៉ត់ចត់ទាំងផ្នែកសន្តិសុខ សុវត្ថិភាព សណ្តាប់ធ្នាប់សាធារណៈ និងសេវាកម្មទេសចរណ៍ ដើម្បីធានាឱ្យព្រឹត្តិការណ៍នេះប្រព្រឹត្តទៅដោយរលូន និងជោគជ័យ។
បុណ្យទន្លេលើកទី១០ នៅខេត្តក្រចេះ មិនត្រឹមតែជាការបង្ហាញអំពីសម្រស់ធម្មជាតិ និងវប្បធម៌ជាតិប៉ុណ្ណោះទេ ប៉ុន្តែថែមទាំងជាវេទិកាសំខាន់មួយសម្រាប់ផ្សព្វផ្សាយកម្ពុជាទៅកាន់ឆាកអន្តរជាតិ ជាគោលដៅទេសចរណ៍បៃតង សុវត្ថិភាព និងពោរពេញដោយសក្តានុពល៕ ដោយនោរៀ
