ខេត្តព្រះសីហនុ៖ មន្ទីររៀបចំដែនដី នគរូបនីយកម្ម សំណង់ និងសុរិយោដី ខេត្តព្រះសីហនុ បានចេញសេចក្តីជូនដំណឹងជាផ្លូវការមួយ អញ្ជើញបណ្តាក្រុមហ៊ុន និងសហគ្រាសស្របច្បាប់ទាំងអស់ក្នុងព្រះរាជាណាចក្រកម្ពុជា ឱ្យចូលរួមដាក់ដេញថ្លៃ (ពិគ្រោះថ្លៃ) លើសេវាកម្មថែទាំ និងជួសជុលសម្ភារៈ បរិក្ខារ ក៏ដូចជាឧបករណ៍បច្ចេកទេសផ្សេងៗ សម្រាប់ប្រតិបត្តិការក្នុងឆ្នាំ២០២៦។
យោងតាមខ្លឹមសារនៃសេចក្តីជូនដំណឹង លេខ ០៧៧/២៦ លស.ដនស ដែលចុះហត្ថលេខា ដោយលោក ចេង ស្រ៊ុង ប្រធានមន្ទីររៀបចំដែនដី ខេត្តព្រះសីហនុ កាលពីថ្ងៃទី២៥ ខែឧសភា ឆ្នាំ២០២៦ កន្លងទៅនេះ លក្ខខណ្ឌ និងកាលបរិច្ឆេទសំខាន់ៗត្រូវបានកំណត់ដូចខាងក្រោម៖
ឯកសារពិគ្រោះថ្លៃ៖ បណ្តាក្រុមហ៊ុន/សហគ្រាស ដែលមានបំណងចូលរួមដេញថ្លៃ អាចទំនាក់ទំនងមកក្រុមលទ្ធកម្មនៃមន្ទីររៀបចំដែនដី ខេត្តព្រះសីហនុ ដើម្បីទទួលយកឯកសារពាក់ព័ន្ធ ចាប់ពីថ្ងៃទី២៦ ខែឧសភា ឆ្នាំ២០២៦ នេះតទៅ រៀងរាល់ម៉ោងធ្វើការ។
ទីតាំង៖ ការិយាល័យរដ្ឋបាលនៃមន្ទីររៀបចំដែនដី ស្ថិតនៅភូមិ១ សង្កាត់៣ ក្រុងព្រះសីហនុ ខេត្តព្រះសីហនុ។
ទំនាក់ទំនងសាកសួរ៖តាមរយៈលេខទូរស័ព្ទ ០៣៤ ៩៣៣ ៨១៤
កាលបរិច្ឆេទឈប់ទទួល និងការបើកសំណើពិគ្រោះថ្លៃ៖ រដ្ឋបាលមន្ទីរនឹងបញ្ឈប់ការទទួលពាក្យ និងធ្វើការបើកសំណើពិគ្រោះថ្លៃជាសាធារណៈនៅ
វេលាម៉ោង ១០:០០ នាទីព្រឹក ថ្ងៃទី០៩ ខែមិថុនា ឆ្នាំ២០២៦។
លក្ខខណ្ឌសំខាន់ៗ៖
រាល់ក្រុមហ៊ុន ឬសហគ្រាសដែលមានសម្ព័ន្ធភាពជាមួយគ្នា ឬមានប្រភពតែមួយ ត្រូវបានអនុញ្ញាតឱ្យដាក់សំណើពិគ្រោះថ្លៃបានត្រឹមតែ មួយច្បាប់ ប៉ុណ្ណោះ។
បេក្ខជនទាំងអស់ត្រូវបំពេញរាល់បែបបទ និងលក្ខខណ្ឌបច្ចេកទេសដែលមានចែងក្នុងឯកសារពិគ្រោះថ្លៃឱ្យបានត្រឹមត្រូវបំផុត។ ការប្រកាសដេញថ្លៃនេះ គឺជាផ្នែកមួយនៃកិច្ចប្រឹងប្រែងរបស់រដ្ឋបាលខេត្តព្រះសីហនុ ក្នុងការធានានូវតម្លាភាព និងប្រសិទ្ធភាពនៃការគ្រប់គ្រងធនធានរដ្ឋ ជាពិសេសលើការថែទាំហេដ្ឋារចនាសម្ព័ន្ធបច្ចេកទេស ដើម្បីបម្រើសេវាសាធារណៈជូនប្រជាពលរដ្ឋក្នុងខេត្តឱ្យកាន់តែមានប្រសិទ្ធភាពខ្ពស់៕
