(ភ្នំពេញ)៖ លោក ហែម វណ្ណឌី រដ្ឋមន្ត្រីក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ បានលើកទឹកចិត្តដល់សហគ្រាសខ្នាតមីក្រូ តូច និងមធ្យមដែលផលិតទំនិញផ្គត់ផ្គង់ក្នុងស្រុក ត្រូវប្រឹងប្រែងពង្រីកខ្លួន ឱ្យកាន់តែធំ និងរឹងមាំ ហើយបើមានបំណងពង្រីកការផលិតទំនិញ សម្រាប់នាំចេញទៅទីផ្សារអន្តរជាតិ ត្រូវពិចារណាឱ្យហើយពីលក្ខខណ្ឌស្តង់ដា ដែលអាចនឹងត្រូវចំណាយទុនខ្ពស់។
ថ្លែងក្នុងសន្និសីទសារព័ត៌មាន ក្នុងទិវាជាតិសហគ្រាសធុនមីក្រូ តូច និងមធ្យម លើកទី៣ ក្រោមប្រធានបទ «សាងស្ពានសម្រាប់សហគ្រាសធុនមីក្រូ តូច និងមធ្យមឆ្ពោះទៅកាន់ទីផ្សារ» នាថ្ងៃទី២៧ ខែមិថុនា ឆ្នាំ២០២៦ លោកបានពន្យល់ថា ស្តង់ដាមានពីរប្រភេទគឺស្តង់ដាអន្តរជាតិ (ISO, IEC, Codex) ដែលត្រូវបានអនុម័តជាសកល ។ចំណែក ស្តង់ដាជាតិអាចនឹងមានភាពបន្ធូរបន្ថយខ្លះស្របតាមស្ថានភាពកម្ពុជា។ ទោះជាយ៉ាងណា ការអនុលោមតាមស្តង់ដាទាំងនេះទាមទារភាពតឹងតែងខ្ពស់ មិនថាជាបរិយាកាសនៃការរៀបចំរោងចក្រ ឬអនាម័យឡើយ ព្រោះស្តង់ដាដូចជា GMP, GHP, ISO គឺមានលក្ខណៈដូចគ្នាទាំងអស់នៅទូទាំងពិភពលោក។
ចំពោះសហគ្រាសធុនតូច និងមធ្យម (MSME) ដែលមានបំណងនាំចេញ ត្រូវពិចារណាលើការវិនិយោគលើការរៀបចំតាមស្តង់ដាទាំងនេះ។ ក្រសួងបានខិតខំជ្រើសរើសស្តង់ដាអាទិភាពសម្រាប់សេដ្ឋកិច្ចជាតិ និងផ្តល់ការគាំទ្រផ្នែកបច្ចេកទេស ពិគ្រោះយោបល់ រួមទាំងការកាត់បន្ថយតម្លៃស្តង់ដាជាតិ ៥០% ធៀបនឹងតម្លៃអន្តរជាតិ។ ភាពជោគជ័យក្នុងការអនុវត្តស្តង់ដាគឺអាស្រ័យលើការហ៊ានវិនិយោគ និងផែនការអាជីវកម្មច្បាស់លាស់៕
