ខេត្តកំពង់ធំ ៖ នៅ ថ្ងៃទី៣ ខែកក្កដា ឆ្នាំ២០២៦ នេះ ស្របពេលដែលរាជរដ្ឋាភិបាលកំពុងរឹតបន្តឹងវិធានការការពារធនធានធម្មជាតិ កងកម្លាំងចម្រុះក្នុងស្រុកសណ្តាន់ បានបើកប្រតិបត្តិការចុះបង្ក្រាប និងទប់ស្កាត់បទល្មើសកាប់បំផ្លាញព្រៃឈើខុសច្បាប់យ៉ាងក្តៅគគុក នៅក្នុងភូមិសាស្ត្រតំបន់អូរជាំស្វាយ ឃុំមានរឹទ្ធិ ស្រុកសណ្តាន់ ខេត្តកំពង់ធំ។
សកម្មភាពបង្ក្រាប និងវត្ថុតាងដែលដកហូតបាន
នៅក្នុងប្រតិបត្តិការចុះល្បាតយ៉ាងហ្មត់ចត់ កងកម្លាំងចម្រុះដែលរួមមានកម្លាំងយោធា មន្ត្រីរដ្ឋបាលព្រៃឈើ និងអាជ្ញាធរមូលដ្ឋាន បានលោតទឹកលំពាស កាត់វាលស្រែដែលកំពុងលិចទឹក ដើម្បីដេញចាប់ និងឃាត់ខ្លួនក្រុមជនល្មើស។
យោងតាមរូបភាពជាក់ស្តែងពីកន្លែងកើតហេតុ បង្ហាញពីសកម្មភាពដ៏សកម្មរបស់កងកម្លាំងចម្រុះឈរជើងយ៉ាងរឹងមាំ និងដើរថ្មើរជើងកាត់ទឹកវាយសម្រុកចូលទៅកាន់គោលដៅ ដើម្បីស្ទាក់ចាប់បទល្មើស។
ដែលបង្ហាញពីលទ្ធផលនៃការបង្ក្រាប ដោយកម្លាំងជំនាញបានធ្វើការឃាត់ទុកនូវមធ្យោបាយល្មើសច្បាប់ រួមមាន គោយន្តកន្ត្រៃកែច្នៃមួយគ្រឿង ដែលផ្ទុកទៅដោយ ឈើអារជាបន្ទះក្តារខុសច្បាប់ជាច្រើនសន្លឹក ដែលក្រុមជនល្មើសបានលួចកាប់ និងដឹកជញ្ជូនឆ្លងកាត់វាលស្រែដែលកំពុងលិចទឹក។
សារព្រមាន៖ជង់មិនដែលភ្លេចកុក ពាក់ព័ន្ធនឹង ការបង្ក្រាបដ៏ក្តៅគគុកនេះ អាជ្ញាធរបានសង្កត់ធ្ងន់ និងដាស់តឿនតាមរយៈទស្សនៈចាស់បុរាណថា៖
មានតែកុកទេដែលភ្លេចជង់ តែជង់មិនដែលភ្លេចកុកឡើយ នេះជាសារព្រមានយ៉ាងធ្ងន់ធ្ងរទៅកាន់ក្រុមជនខិលខូចដែលតែងតែលួចលាក់កាប់បំផ្លាញ និងដឹកជញ្ជូនឈើខុសច្បាប់ ទោះបីជាពួកគេព្យាយាមប្រើប្រាស់ល្បិចកល ឬឆ្លៀតឱកាសក្នុងស្ថានភាពផ្លូវលំបាក (ផ្លូវទឹក) យ៉ាងណាក៏ដោយ ក៏មិនអាចគេចផុតពីសំណាញ់ច្បាប់ និងការតាមប្រមាញ់របស់សមត្ថកិច្ចឡើយ។
ការផ្សព្វផ្សាយជាលក្ខណៈអន្តរជាតិលើការការពារព្រៃឈើ
បទល្មើសព្រៃឈើមិនមែនជាបញ្ហាក្នុងស្រុកនោះទេ ប៉ុន្តែវាជាវិបត្តិបម្រែបម្រួលអាកាសធាតុសកល។ ការផ្សព្វផ្សាយពីសកម្មភាពបង្ក្រាបជាក់ស្តែងរបស់កម្លាំងសមត្ថកិច្ចចម្រុះ នៅតំបន់អូរជាំស្វាយនេះ គឺជាការបង្ហាញអំពី៖
១.ការប្តេជ្ញាចិត្តខ្ពស់ក្នុងការអនុវត្តច្បាប់ស្តីពីព្រៃឈើ ដោយគ្មានការលើកលែង។
២.ការលះបង់របស់មន្ត្រីជួរមុខទោះបីជាត្រូវឆ្លងកាត់ការលំបាក លិចទឹក លិចភក់ ក្នុងរដូវវស្សាយ៉ាងណាក៏ដោយ ក៏កងកម្លាំងនៅតែបន្តបេសកកម្មយ៉ាងសកម្ម។
៣.ការអំពាវនាវសកល ជំរុញឱ្យមានការចូលរួមការពារព្រៃឈើដែលជាសួតនៃភពផែនដី និងទប់ស្កាត់ការជួញដូរឈើខុសច្បាប់នៅគ្រប់ទម្រង់។
បច្ចុប្បន្ន វត្ថុតាងគោយន្ត និងឈើអារខុសច្បាប់ទាំងអស់ ត្រូវបានកម្លាំងជំនាញវាស់វែង និងដកហូតរក្សាទុក ដើម្បីកសាងសំណុំរឿងតាមនីតិវិធីច្បាប់ជាធរមាន៕ ដោយ សឿង សុទ្ធ
