ខេត្តកំពង់ធំ៖ ក្នុងអំឡុងពេលដែលរាជរដ្ឋាភិបាលកំពុងអនុវត្តវិធានការបិទនេសាទ ដើម្បីការពាររដូវត្រីពងកូន និងពូជមច្ឆជាតិ អាជ្ញាធរមានសមត្ថកិច្ច និងមន្ត្រីជំនាញជលផលនៃខេត្តកំពង់ធំ នៅតែបន្តបេសកកម្មយ៉ាងសកម្មមិនដកដៃឡើយ ក្នុងការចុះល្បាត ត្រួតពិនិត្យ និងបង្ក្រាបបទល្មើសជលផលគ្រប់រូបភាពនៅក្នុងភូមិសាស្ត្រទទួលខុសត្រូវរបស់ខ្លួន។
ជាក់ស្តែង នៅថ្ងៃទី២៤ ខែកញ្ញា ឆ្នាំ២០២៦ ក្រោមការចង្អុលបង្ហាញ និងបញ្ជាយ៉ាងម៉ឺងម៉ាត់ពី លោក ប៉ែន វណ្ណារិទ្ធ ប្រធានមន្ទីរកសិកម្ម រុក្ខាប្រមាញ់ និងនេសាទខេត្តកំពង់ធំ និងដោយមានការអនុញ្ញាតពី លោក ជិន ស៊ីថា នាយខណ្ឌរដ្ឋបាលជលផលកំពង់ធំ , លោក យ៉េង យ៉ាន នាយសង្កាត់រដ្ឋបាលជលផល ក្រុងស្ទឹងសែន និង លោក សៀង ហុកឃាន់ មេបញ្ជាការផ្នែកសឹករងក្រុងស្ទឹងសែន បានដឹកនាំកម្លាំងជំនាញរួមគ្នាចំនួន ៨នាក់ ដោយប្រើប្រាស់កាណូត ២គ្រឿង និងប្រេងសាំងចំនួន ៤០លីត្រ ចុះប្រតិបត្តិការត្រួតពិនិត្យ និងបង្ក្រាបបទល្មើសជលផលនៅតំបន់វាលក្រោម ស្ថិតក្នុងភូមិសាស្ត្រសង្កាត់ស្រយ៉ូវ ក្រុងស្ទឹងសែន ជាប់ព្រំប្រទល់ស្រុកសន្ទុក ខេត្តកំពង់ធំ។
នៅក្នុងប្រតិបត្តិការល្បាតនៅចំណុចបឹងអំពែ និងព្រែកដំរីឡូត កម្លាំងចម្រុះបានរកឃើញ និងធ្វើការរុះរើ បំផ្លាញចោលនូវឧបករណ៍នេសាទខុសច្បាប់ជាច្រើនប្រភេទ រួមមាន៖
របាំងស្បៃមុង ប្រវែងសរុប ១,៨០០ ម៉ែត្រ
ឡុក ចំនួន ២៥ គ្រឿង
លូស្បៃមុង ចំនួន ២៥ មាត់
បង្គោលឈើ ចំនួន ១,៩០០ ដើម
ទន្ទឹមនឹងការរុះរើឧបករណ៍ខុសច្បាប់ទាំងនេះ កម្លាំងជំនាញក៏បានធ្វើការចាក់លែងកូនត្រីចម្រុះទម្ងន់ប្រមាណ ៩០ កីឡូក្រាម ដែលជាប់នៅក្នុងឧបករណ៍ប្រមូលទិន្នផលខុសច្បាប់ទាំងនោះ ឱ្យត្រឡប់ទៅរស់នៅក្នុងបឹងធម្មជាតិវិញ ដើម្បីរក្សាពូជត្រី និងស្តារផលស្តុកមច្ឆជាតិឡើងវិញ។
យោងតាម ច្បាប់ស្តីពីជលផល នៃព្រះរាជាណាចក្រកម្ពុជា ការកំណត់រដូវបិទនេសាទ (រដូវត្រីពងកូន និងលូតលាស់) ត្រូវ បានអនុវត្តជារៀងរាល់ឆ្នាំ ចាប់ពីថ្ងៃទី០១ ខែមិថុនា រហូតដល់ថ្ងៃទី០១ ខែតុលាទើបបើកវិញ អាស្រ័យលើតំបន់ភូមិសាស្ត្រដែននេសាទ។
ក្នុងអំឡុងពេលនេះបទល្មើសដែលត្រូវហាមឃាត់រួមមាន៖
១.បទល្មើសហាមឃាត់៖រាល់សកម្មភាពនេសាទដោយប្រើប្រាស់ឧបករណ៍នេសាទពាណិជ្ជកម្ម (ឡុក, របាំងស្បៃមុង, ស្បៃអួន, ឧបករណ៍ឆក់, រ៉ាវ, ឬការបំពុល) ត្រូវ បានហាមឃាត់ដាច់ខាត។
២.ឧបករណ៍ដែលអនុញ្ញាត៖អនុញ្ញាតឱ្យតែការនេសាទលក្ខណៈគ្រួសារដោយប្រើឧបករណ៍បុរាណតូចតាច (ដូចជា សំណាញ់, សន្ទូច, ចឹង, ឬសៃ) ប៉ុណ្ណោះ ដើម្បីធានាជីវភាពប្រចាំថ្ងៃ។
៣.ទោសប្បញ្ញត្តិ៖ បុគ្គលណាដែលប្រព្រឹត្តបទល្មើសប្រើប្រាស់ឧបករណ៍ហាមឃាត់ ឬនេសាទក្នុងតំបន់អភិរក្សអំឡុងរដូវបិទនេសាទ នឹងត្រូវប្រឈមមុខនឹងទោសទណ្ឌតាមច្បាប់ជាធរមាន រាប់ចាប់ពីការរឹបអូស និងបំផ្លាញចោលនូវឧបករណ៍នេសាទ ការពិន័យជាប្រាក់ និងការបញ្ជូនខ្លួនទៅតុលាការដើម្បីផ្តន្ទាទោសដាក់ពន្ធនាគារតាមកម្រិតនៃបទល្មើស។
ការអប់រំ និងការអំពាវនាវដល់បងប្អូនប្រជានេសាទ មន្ត្រីជំនាញរដ្ឋបាលជលផល រួមជាមួយអាជ្ញាធរដែនដី បានសម្តែងនូវការព្រួយបារម្ភយ៉ាងខ្លាំងចំពោះការប្រើប្រាស់ឧបករណ៍នេសាទបំផ្លិចបំផ្លាញ ដូចជា
ស្បៃមុង ដែលជាឧបករណ៍ក្រឡាញឹក ប្រមូលផ្តុំចាប់តាំងពីកូនត្រីតូចៗទើបនឹងញាស់ រហូតដល់ត្រីធំៗ ធ្វើឱ្យមច្ឆជាតិគ្មានឱកាសលូតលាស់ និងបង្កើតកូនចៅតទៅមុខទៀតបានឡើយ។
ក្នុងន័យនេះ អាជ្ញាធរមានសមត្ថកិច្ច និងមន្ត្រីជំនាញសូមអំពាវនាវ និងអប់រំណែនាំយ៉ាងទទូចដល់បងប្អូនប្រជានេសាទទាំងអស់ ចូលរួមគោរពច្បាប់ជលផល សូមបញ្ឈប់ជាបន្ទាន់នូវការប្រើប្រាស់ឧបករណ៍នេសាទខុសច្បាប់គ្រប់ប្រភេទ ជាពិសេសស្បៃមុង និងឧបករណ៍ឆក់ត្រី។
សហការជាមួយអាជ្ញាធរ៖សូមចូលរួមធ្វើជា «ភ្នែក និងត្រចៀក» របស់អាជ្ញាធរ ដោយរាយការណ៍ជាបន្ទាន់នូវរាល់សកម្មភាពលួចធ្វើនេសាទខុសច្បាប់នៅក្នុងមូលដ្ឋាន ដើម្បីឱ្យកម្លាំងសមត្ថកិច្ចចុះទប់ស្កាត់ និងបង្ក្រាបបានទាន់ពេលវេលា។
រួមគ្នាថែរក្សាធនធានធម្មជាតិ៖ការការពារត្រីពងកូន និងប្រព័ន្ធអេកូឡូស៊ីនៅថ្ងៃនេះ គឺជាការធានានូវប្រភពស្បៀង និងប្រភពចំណូលប្រកបដោយចីរភាពសម្រាប់បងប្អូនប្រជានេសាទ និងកូនចៅជំនាន់ក្រោយនៅថ្ងៃអនាគត។
រដ្ឋបាលជលផល និងកម្លាំងប្រដាប់អាវុធគ្រប់លំដាប់ថ្នាក់ ប្តេជ្ញាចិត្តថានឹងបន្តចុះល្បាត ស្រាវជ្រាវ និងបង្ក្រាបបទល្មើសជលផលយ៉ាងម៉ឺងម៉ាត់បំផុត ដើម្បីការពារសម្បត្តិធម្មជាតិរបស់ជាតិឱ្យបានគង់វង្ស៕
អត្ថបទដោយ សង្កាត់ជលផលក្រុងស្ទឹងសែន
