ក្រុមមេដឹកនាំរដ្ឋប្រហារយោធានៅហ្គីណេបានសន្យាកាលពីថ្ងៃចន្ទទី៦កញ្ញាថានឹងបង្កើតរដ្ឋាភិបាលអន្តរកាលរួបរួមជាតិមួយបន្ទាប់ពីបានទម្លាក់ប្រធានាធិបតីអាល់ហ្វា ខុនដេ និង រំលាយគណៈរដ្ឋ មន្ត្រីរបស់គាត់។
រដ្ឋប្រហារកាលពីថ្ងៃអាទិត្យដែលក្នុងនោះលោកខុនដេនិងអ្នកនយោបាយកំពូលៗផ្សេងទៀតត្រូវបានឃុំខ្លួនឬហាមឃាត់មិនឱ្យធ្វើដំណើរ គឺជារដ្ឋប្រហារលើកទីបីចាប់តាំងពីខែមេសានៅអាហ្វ្រិកខាងលិចនិងអាហ្វ្រិកកណ្តាល ដែលបង្កើនការព្រួយបារម្ភអំពីការវិលត្រឡប់ទៅរកការ គ្រប់គ្រងរបស់យោធានៅក្នុងតំបន់ដែលកំពុងបោះជំហានឆ្ពោះទៅរកលទ្ធិប្រជាធិបតេយ្យពហុបក្សចាប់តាំងពីទសវត្សរ៍ឆ្នាំ ១៩៩០ ។
ការដណ្តើមអំណាចនេះត្រូវបានមហាអំណាចអន្តរជាតិថ្កោលទោសយ៉ាងខ្លាំងក្លាដោយដាក់សម្ពាធលើមេដឹកនាំយោធាថ្មីដើម្បីផ្តល់ផែនការហួសពីការផ្តួលរំលំបទបញ្ជាចាស់និងដើម្បីធានាដល់វិនិយោគិនថា ការនាំចេញរ៉ែសំខាន់ៗរបស់ហ្គីណេនឹងមិនត្រូវបានកាត់ផ្តាច់។
មេដឹកនាំរដ្ឋប្រហារលោកម៉ាម៉ាឌី ឌូមប៊ូយ៉ា ជាអតីតមន្ត្រីកងវរសេនាតូចបារាំង បានប្រាប់កិច្ចប្រជុំរបស់រដ្ឋមន្ត្រីនិងមន្ត្រីរដ្ឋាភិបាលជាន់ខ្ពស់របស់លោកខុនដេថា”ការពិគ្រោះយោបល់នឹងត្រូវបានធ្វើ ឡើងដើម្បីកំណត់ក្របខ័ណ្ឌសំខាន់នៃអន្តរកាល បន្ទាប់មករដ្ឋាភិបាលរួបរួមជាតិនឹងត្រូវបានរៀបចំ ឡើងដើម្បីដឹកនាំអន្តរកាលនេះ”។
លោកបាននិយាយដោយមានកងទ័ពមួកក្រហមអមជុំជិតថា “នៅចុងបញ្ចប់នៃដំណាក់កាលអន្តរកាលនេះយើងនឹងកំណត់សំឡេងសម្រាប់យុគសម័យថ្មីមួយសម្រាប់អភិបាលកិច្ចនិងការអភិវឌ្ឍសេដ្ឋកិច្ច”។ លោកឌូមប៊ូយ៉ាមិនបាននិយាយថាតើដំណើរអន្តរកាលនឹងមានន័យយ៉ាងដូចម្តេចឬផ្តល់កាលបរិច្ឆេទសម្រាប់ការវិលត្រឡប់ទៅរកការបោះឆ្នោតតាមបែបប្រជាធិបតេយ្យវិញនោះទេ។
ការដណ្តើមអំណាចរបស់លោកឌូមប៊ូយ៉ាត្រូវបានបង្កឡើងដោយការមិនពេញចិត្តយ៉ាងខ្លាំងចំពោះលោកខុនដេអាយុ ៨៣ឆ្នាំដែលបានសន្យាឱ្យមានលទ្ធិប្រជាធិបតេយ្យប្រកបដោយស្ថិរភាពប៉ុន្តែនៅពេលបានកាន់អំណាចបែរជាបំបិទមាត់គូប្រជែងយ៉ាងធ្ងន់ធ្ងរ ខកខានក្នុងការកាត់បន្ថយភាព ក្រីក្រនិងកាលពីឆ្នាំមុនបានសម្រេចចិត្តឈរឈ្មោះប្រជែងតំណែងប្រធានាធិបតីអាណត្តិទីបី ជាចំណាត់ការមួយដែលមនុស្សភាគច្រើននិយាយថាខុសច្បាប់។
រដ្ឋប្រហារនេះត្រូវបានស្វាគមន៍ដោយមនុស្សភាគច្រើន ប៉ុន្តែបង្កការបារម្ភដល់វិស័យរ៉ែ។ ហ្គីណេមានរ៉ែបុកស៊ីតធំជាងគេបំផុតនៅលើពិភពលោក ជារ៉ែប្រើសម្រាប់ផលិតអាលុយមីញ៉ូម។
តម្លៃលោហៈបានហក់ឡើងដល់កម្រិតខ្ពស់បំផុតក្នុងរយៈពេល ១០ ឆ្នាំកាលពីថ្ងៃចន្ទ ទោះបីមិនមានសញ្ញានៃការរំខានដល់ការផ្គត់ផ្គង់រ៉ែក៏ដោយ។
នៅក្នុងកិច្ចខិតខំប្រឹងប្រែងដើម្បីបំបាត់ការព្រួយបារម្ភ លោកឌូមប៊ូយ៉ាបាននិយាយថា ព្រំដែនសមុទ្រនឹងនៅតែបើកចំហដដែល ដូច្នេះផលិតផលរ៉ែអាចនាំចេញបាន។ លោកបាននិយាយថា បម្រាមគោចរពេលយប់នៅពេលនេះមិនអនុវត្តចំពោះវិស័យរ៉ែទេ។
លោកបាននិយាយថា “ខ្ញុំអាចធានាដល់ដៃគូពាណិជ្ជកម្មនិងសេដ្ឋកិច្ចថា សកម្មភាពនានានឹងបន្តជាធម្មតានៅក្នុងប្រទេសនេះ។ យើងបានស្នើសុំឱ្យក្រុមហ៊ុនរ៉ែបន្តសកម្មភាពរបស់ពួកគេ”៕
