(មីនស្កិ៍)៖ តាមការចេញផ្សាយដោយទីភ្នាក់ងារ សារព័ត៌មាន AFP នៅថ្ងៃសុក្រ ទី២២ ខែកក្កដា ឆ្នាំ២០២២ គឺ ប្រធានាធិបតីបេឡារុស លោក អាឡិចហ្សាន់ឌឺ លូកាសិនកូ (Alexander Lukashenko) បានទទួលស្គាល់ថាលោកពិតជាដឹកនាំប្រទេស តាមបែបផ្ដាច់ការពិតមែន ប៉ុន្តែអះ អាងថាមិនមានអ្នកទោសនយោបាយនៅក្នុងប្រទេសរបស់លោកឡើយ។
លោក លូកាសិនកូ ធ្វើការកត់សម្គាល់ខាងលើនៅក្នុងកិច្ចសម្ភាសន៍ផ្ដាច់មុខជាមួយទីភ្នាក់ងារ សារព័ត៌មាន AFP នៅថ្ងៃព្រហស្បតិ៍សប្ដាហ៍នេះ។ ថ្លែងនាឱកាសនោះ ប្រធានាធិបតីវ័យ៦៧ឆ្នាំរូប នេះ បានគូសបញ្ជាក់ដូច្នេះថា «ជាការពិតណាស់ ប្រព័ន្ធអំណាចរបស់យើងពិតជាផ្ដាច់ការ ហើយខ្ញុំក៏ មិន បដិសេធនឹងប្រើពាក្យផ្ដាច់ការនេះដែរ»។
នៅក្នុងកិច្ចសម្ភាសន៍នោះដែរលោក លូកាសិនកូ បានប្រកាន់ជំហរមិននិយាយពីការឃុំខ្លួនសកម្មជន នយោបាយ និងសកម្មសិទ្ធិមនុស្សជាង ១,២៥៩នាក់ ដែលអង្គការសង្គមស៊ីវិលបេឡារុស អះអាង ថាកំពុងជាប់ឃុំក្នុងពន្ធនាគារដោយអយុត្តិធម៌នោះទេ។ ប៉ុន្តែ លោក លូកាសិនកូបានបញ្ជាក់ថានៅ ក្នុងប្រទេសរបស់លោកគ្មានអ្នកទោសនយោបាយណាមួយមកពីគណបក្សប្រឆាំងកំពុងជាប់ឃុំក្នុងពន្ធនាគារ នៅក្រោមការដឹកនាំកណ្ដាប់ដៃរបស់លោកឡើយ។
គួរបញ្ជាក់ថា លោក លូកាសិនកូ បានដឹកនាំប្រទេសបេឡារុសចាប់តាំងពីឆ្នាំ១៩៩៤មក ហើយ លោកបានជាប់ឆ្នោតជាថ្មីកាលពីឆ្នាំ២០២០ នៅក្នុងការ បោះឆ្នោតសកលមួយដែលសហរដ្ឋអាមេរិក និងសហភាពអឺរ៉ុបប្រកាសមិនទទួលស្គាល់លទ្ធផលបោះឆ្នោត៕
