ភ្លៀងធ្លាក់ខ្លាំងនៅភាគខាងជើងវៀតណាម ជន់លិចផ្លូវជាច្រើននៅរដ្ឋធានីហាណូយ

(ហាណូយ)៖  តាមការចេញផ្សាយដោយ ទីភ្នាក់ងារព័ត៌មាន AFP នាថ្ងៃព្រហស្បតិ៍ ទី២៨ ខែកក្កដា ឆ្នាំ២០២៣​ បានបញ្ជាក់ថា ភ្លៀងធ្លាក់ខ្លាំងបាននិងកំពុងវាយលុកលើ តំបន់ភាគខាងជើងនៃប្រទេស វៀតណាម ដោយនាថ្ងៃព្រហស្បតិ៍នេះ បានបង្កឱ្យមាន​ការជន់លិចផ្លូវនិងរាំងស្ទះចរាចណ៍ នៅពាស ពេញរដ្ឋធានីហាណូយ។

នាវេលាព្រឹកថ្ងៃព្រហស្បតិ៍នេះ ចរាចរណ៍នៅតាមតំបន់ទីប្រជុំនៃទីក្រុងហាណូយ បានជួបភាពជាប់ គាំងដោយសារតែការជន់លិចផ្លូវ ក្រោយមាន​ភ្លៀងធ្លាក់ខ្លាំង។ ផ្លូវសំខាន់ៗនៅក្នុងរដ្ឋធានីរបស់វៀតណាម ត្រូវបានទឹកជន់លិចកម្ពស់ចន្លោះ៣០-៥០សង់ទីម៉ែត្រ បន្ទាប់ពីភ្លៀងបានបន្តធ្លាក់ឥតឈប់ឈរ តាំងតែពីយប់ថ្ងៃពុធ។ ចំណែកនៅតាមបណ្តាខេត្តមួយចំនួន ក្នុងតំបន់ភាគខាងជើងវៀតណាម ដូចជាខេត្ត ថាញ់ ហូ (Thanh Hoa), ញេ អាន (Nghe An) និងហាធីញ (Ha Tinh) ក៏បានមើលឃើញការលិចលង់ធ្ងន់ ធ្ងរ រួមជាមួយគ្រោះបំណាក់ដី ដោយសារតែភ្លៀងធ្លាក់ផងដែរ នៅក្នុងសប្តាហ៍នេះ។

គួរបញ្ជាក់ថា វៀតណាមគឺជាប្រទេសងាយទទួលរងគ្រោះ ដោយសារព្យុះភ្លៀង និងទឹកជំនន់ដែល លក្ខណៈកាចសាហាវ។ តួយ៉ាង យោងតាមស្ថិតិរបស់​រដ្ឋាភិបាលវៀតណាមផ្ទាល់ មានមនុស្ស៤៥១ នាក់ បានបាត់បង់ជីវិតឬបាត់ខ្លួន កាលពីឆ្នាំទៅមិញ ដោយសារតែគ្រោះមហន្តរាយធម្មជាតិ ដូចជា ទឹកជំនន់និងបំណាក់ដីជាដើម។ ទឹកជំនន់បានក្លាយជាបញ្ហា ដែលកើតមានកាន់តែញឹកញាប់ នៅ​ទីក្រុងហាណូយ ស្របពេល​ដែលផ្លូវនិងប្រព័ន្ធលូបង្ហូរទឹក ពិបាកក្នុងការគាំទ្រចំនួនប្រជាជនដែល បន្តកើនឡើងយ៉ាងឆាប់រហ័ស៕