(បរទេស)៖ ក្រុមហ៊ុនផលិតរថយន្តអគ្គិសនីយក្សរបស់អាមេរិក Tesla បានបង្កើតសាខាមួយជាផ្លូវការនៅក្នុងប្រទេសវៀតណាម ដែលជាព្រឹត្តិការណ៍ដ៏សំខាន់មួយបង្ហាញពីការចូលខ្លួនទៅកាន់ទីផ្សាររថយន្តអគ្គិសនី (EV) ដ៏មានសក្ដានុពល និងរីកចម្រើនលឿនជាងគេមួយនៅអាស៊ីអាគ្នេយ៍។ នេះបើយោងតាមការចេញផ្សាយដោយទីភ្នាក់ងារសារព័ត៌មាន Reuters នៅថ្ងៃទី១៤ ខែកញ្ញា ឆ្នាំ២០២៦។
យោងតាមឯកសារចុះបញ្ជីពាណិជ្ជកម្មដែលទើបតែត្រូវបានផ្សព្វផ្សាយ ក្រុមហ៊ុនបុត្រសម្ព័ន្ធថ្មីនេះមានឈ្មោះថា «Tesla Motors Vietnam Limited Liability Company» ដោយបានចុះបញ្ជីនៅទីក្រុងហូជីមិញ កាលពីថ្ងៃទី១១ ខែកញ្ញា ជាមួយនឹងទុនចុះបញ្ជីចំនួន ៧៧,៦៦៧ ពាន់លានដុង (ស្មើនឹងប្រមាណ ៣ លានដុល្លារ)។ អាជ្ញាប័ណ្ណអាជីវកម្មរបស់ក្រុមហ៊ុននេះ អនុញ្ញាតឱ្យមានសកម្មភាពលក់ដុំ និងលក់រាយរថយន្ត គ្រឿងបន្លាស់ គ្រឿងចក្រ ព្រមទាំងការនាំចូល នាំចេញ និងចែកចាយពាក់ព័ន្ធផ្សេងៗទៀត។ ទោះជាយ៉ាងណាក៏ដោយ ទីភ្នាក់ងារសារព័ត៌មាន Reuters បានរាយការណ៍ថា «Tesla មិនទាន់បានឆ្លើយតបជាបន្ទាន់ចំពោះសំណើសុំការអធិប្បាយ» ជុំវិញការបង្កើតសាខានេះនៅឡើយទេ។
ពាក់ព័ន្ធនឹងរចនាសម្ព័ន្ធដឹកនាំ ឯកសារចុះបញ្ជីបានបង្ហាញថា លោក David Jon Feinstein ជនជាតិអាមេរិកដែលមានអាសយដ្ឋាននៅរដ្ឋតិចសាស់ គឺជាប្រធានក្រុមហ៊ុន រីឯលោកស្រី Isabel Ching Fan ជាអគ្គនាយិកា និងលោក Nguyen Manh Hung កាន់តួនាទីជាជំនួយការអគ្គនាយក។ ការបង្កើតសាខានេះ ត្រូវបានសារព័ត៌មាន Reuters វាយតម្លៃថាជា «ការចូលខ្លួនជាផ្លូវការចូលទៅក្នុងមួយក្នុងចំណោមទីផ្សាររថយន្តអគ្គិសនីដែលមានការរីកចម្រើនលឿនជាងគេនៅអាស៊ីអាគ្នេយ៍»៕
