
(ហ្វីលីពីន)៖ នៅព្រឹកថ្ងៃអង្គារ ទី១៧ ខែវិច្ឆិកា ឆ្នាំ២០២៦នេះ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីកម្ពុជា បន្តអញ្ជើញចូលរួមកិច្ចប្រជុំកំពូលអាស៊ាន-ជប៉ុន លើកទី២៩ ដែលរៀបចំឡើងនៅប្រទេសហ្វីលីពីន ជាប្រធានអាស៊ានប្តូរវេនឆ្នាំ២០២៦នេះ។
កិច្ចប្រជុំកំពូលអាស៊ាន-ជប៉ុនលើកទី២៩ ដឹកនាំរួមគ្នាដោយប្រធានាធិបតីហ្វីលីពីន លោក ហ្វែឌីណាន់ រ៉ូម៉ាអល់ដេស ម៉ាកូស (Ferdinand R. Marcos Jr.) ជាប្រធានអាស៊ាន និងនាយករដ្ឋមន្ត្រីជប៉ុន លោកស្រី តាកាអិជិ សាណាយ៉ិ (Sanae Takaichi)។
សូមបញ្ជាក់ថា អាស៊ាន និងជប៉ុន បានចាប់ផ្តើមទំនាក់ទំនងសន្ទនាក្រៅផ្លូវការនៅ ឆ្នាំ១៩៧៣ ហើយបានក្លាយជាដៃគូសន្ទនាផ្លូវការនៅ ខែមីនា ឆ្នាំ១៩៧៧។ ប្រទេសជប៉ុនគឺជាដៃគូសន្ទនាដំបូងគេបង្អស់របស់អាស៊ាន។

ភាពជាដៃគូយុទ្ធសាស្ត្រគ្រប់ជ្រុងជ្រោយរវាងអាស៊ាន និងជប៉ុន បាននាំមកនូវកំណើនសេដ្ឋកិច្ច សន្តិភាព និងការអភិវឌ្ឍប្រកបដោយចីរភាព ដល់តំបន់ទាំងមូល។ ភាគីទាំងពីរផ្តោតលើសសរស្តម្ភសំខាន់ៗចំនួនបី រួមមានដៃគូដើម្បីសន្តិភាព និងស្ថិរភាព ដៃគូដើម្បីរួមគ្នាបង្កើតសេដ្ឋកិច្ច និងសង្គមនាពេលអនាគត និងដៃគូពីបេះដូងទៅបេះដូងឆ្លងកាត់ជំនាន់។ សសរស្តម្ភទាំងនេះត្រូវបានដាក់ចេញជាផ្លូវការក្នុងកិច្ចប្រជុំកំពូលរំលឹកខួបអនុស្សាវរីយ៍ ៥០ ឆ្នាំអាស៊ាន-ជប៉ុន នៅទីក្រុងតូក្យូ កាលពីខែធ្នូ ឆ្នាំ២០២៣។ ក្រៅពីសសរស្តម្ភទាំង៣ អាស៊ាន និងជប៉ុន មានកិច្ចសហប្រតិបត្តិការលើវិស័យជាច្រើន។
ប្រទេសជប៉ុន គឺជាដៃគូពាណិជ្ជកម្មធំទី៤ និងជាប្រភពវិនិយោគផ្ទាល់ពីបរទេស (FDI) ធំទី ២ របស់អាស៊ាន។ កិច្ចព្រមព្រៀងភាពជាដៃគូសេដ្ឋកិច្ចគ្រប់ជ្រុងជ្រោយអាស៊ាន-ជប៉ុន (AJCEP) បានជួយកាត់បន្ថយពន្ធគយ និងបើកទីផ្សារសម្រាប់ប្រជាជនជាង ៨០០លាននាក់៕




































