ខេត្តព្រះវិហារ៖ នាព្រឹកថ្ងៃចន្ទ ទី១៦ ខែវិច្ឆិកា ឆ្នាំ២០២៦ នេះ រដ្ឋបាលស្រុករវៀង ខេត្តព្រះវិហារ បានរៀបចំពិធីប្រកាសចូលកាន់មុខតំណែង លោក ទិត សុខាម ជាអភិបាល នៃគណៈអភិបាលស្រុករវៀង ក្រោមអធិបតីភាពដ៏ខ្ពង់ខ្ពស់របស់ លោក ប្រាក់ សុវណ្ណ ប្រធានក្រុមប្រឹក្សាខេត្តព្រះវិហារ និង លោក គីម រិទ្ធី អភិបាល នៃគណៈអភិបាលខេត្តព្រះវិហារ។
ពិធីដ៏មានសារៈសំខាន់នេះ ត្រូវបានប្រារព្ធធ្វើឡើងនៅសាលប្រជុំសាលាស្រុករវៀង ដោយមានការអញ្ជើញចូលរួមយ៉ាងច្រើនកុះករពីសំណាក់ ឯកឧត្តម លោកជំទាវ សមាជិកក្រុមប្រឹក្សាខេត្ត គណៈអភិបាលរងខេត្ត លោក ប្រធានសាលាដំបូងខេត្ត តំណាងអយ្យការអមសាលាដំបូងខេត្ត លោក លោកស្រី នាយក នាយករងរដ្ឋបាលសាលាខេត្ត មេបញ្ជាការកងកម្លាំងប្រដាប់អាវុធទាំងបីប្រភេទ ប្រធានមន្ទីរ-អង្គភាពជុំវិញខេត្ត ក្រុមប្រឹក្សាស្រុក គណៈអភិបាលស្រុក ប្រធានការិយាល័យជំនាញ មន្ត្រីរាជការចំណុះរដ្ឋបាលស្រុក ព្រមទាំងលោក លោកស្រី មេឃុំទាំង ១២ ឃុំ ទូទាំងស្រុករវៀង។
បន្ទាប់ពីការអានអនុក្រឹត្យរបស់រាជរដ្ឋាភិបាលកម្ពុជា ស្តីពីការតែងតាំងមុខតំណែង និងពិធីប្រគល់អនុក្រឹត្យ ព្រមទាំងត្រារដ្ឋបាលស្រុករួចមក លោក ទិត សុខាម អភិបាលស្រុករវៀងដែលទើបចូលកាន់តំណែងថ្មី បានឡើងធ្វើការប្តេជ្ញាចិត្តយ៉ាងមុតមាំចំពោះមុខគណៈអធិបតី និងអង្គពិធីទាំងមូល ដោយសន្យាថានឹងខិតខំប្រឹងប្រែងបំពេញភារកិច្ចតាមតួនាទីឱ្យអស់ពីកម្លាំងកាយចិត្ត និងប្រាជ្ញាស្មារតី។ លោកបានប្តេជ្ញាពង្រឹងសាមគ្គីភាពផ្ទៃក្នុង រក្សាសន្តិសុខ សណ្តាប់ធ្នាប់សាធារណៈ លើកកម្ពស់ការផ្តល់សេវាសាធារណៈជូនប្រជាពលរដ្ឋឱ្យកាន់តែមានប្រសិទ្ធភាព តម្លាភាព និងឆាប់រហ័ស ស្របតាមគោលនយោបាយវិមជ្ឈការ និងវិសហមជ្ឈការ ព្រមទាំងយុទ្ធសាស្ត្របញ្ចកោណ-ដំណាក់កាលទី១ របស់រាជរដ្ឋាភិបាល។
មានប្រសាសន៍សំណេះសំណាល និងផ្តល់អនុសាសន៍ណែនាំក្នុងឱកាសនោះ ឯកឧត្តម គីម រិទ្ធី អភិបាល នៃគណៈអភិបាលខេត្តព្រះវិហារ បានសម្តែងនូវការកោតសរសើរ និងវាយតម្លៃខ្ពស់ចំពោះក្រុមប្រឹក្សាស្រុក គណៈអភិបាលស្រុក មន្ត្រីរាជការ កងកម្លាំងប្រដាប់អាវុធ និងអាជ្ញាធរមូលដ្ឋានគ្រប់លំដាប់ថ្នាក់ ដែលបានរួមសាមគ្គីគ្នាខិតខំប្រឹងប្រែងអភិវឌ្ឍស្រុករវៀងឱ្យមានការរីកចម្រើនលើគ្រប់វិស័យនាពេលកន្លងមក។
ពិធីប្រកាសចូលកាន់មុខតំណែងនេះ បានបញ្ចប់ទៅក្នុងបរិយាកាសស្និទ្ធស្នាល រីករាយ និងប្រកបដោយស្មារតីទទួលខុសត្រូវខ្ពស់ ក្រោមការអបអរសាទរយ៉ាងកក់ក្តៅពីសំណាក់ថ្នាក់ដឹកនាំ និងមន្ត្រីរាជការទាំងអស់៕សួនពិសិត










































